E tim di Special Olympics Kòrsou ta ansioso pa anunsiá nan biahe di djasabra 10 di yüni 2023 pa e tan antisipá Weganan Mundial di Olimpiada Spesial, e asina yamá Special Olympics World Games, ku lo tuma lugá na Berlin di 17 pa 25 di yüni. Ku inmenso orguyo i determinashon e ekipo ta preparando pa kompetí den kuater deporte eksitante: bowling, bolas, landamentu i powerlifting. E evento internashonal akí lo trese miles di atleta spesial di rònt mundu huntu, promoviendo inklusividat, deportivismo i e selebrashon di abilidat.
E Weganan Mundial konosí komo e evento máksimo den ekselensia di deporte pa persona ku desabilidat intelektual, lo ta un okashon memorabel pa e tim di Special Olympics Curaçao. E tim a dediká tantísimo ora na training, desaroyando nan abilidatnan i preparando nan mes tantu físikamente komo mentalmente pa demostrá nan talentonan remarkabel riba un esenario mundial. E delegashon di Kòrsou ta konsistí di diesocho persona i ta dirigí pa Willy Harms komo kabes di e delegashon, e asistante di e kabes di e delegashon Enrico Viscaïno i miembro di e staf médiko Anchel de Palm. Tin shete (7) atleta Elisa Harmsen, Rodeangello Willems, Shuvensley Brandao, Ryanella Mathilda, Renata Pestana, Victor Brown I Jiven Naaldijk, kuater (4) ‘unified partners’ ku ta persona sin desabilidat ku ta kompetí den kombinashon ku un atleta special Patricia de Sousa, Julissa Perez, Dencill Estanista, and Tito Fernandes, I kuater (4) coach
Quincy Martina, Dicla van der Veen, Suzette Everts and Rolando Rodrigues.
Den bowling, e tim di dos atleta spesial Renata Pestana i Victor Brown huntu ku nan unified partners Patricia de Sousa i Tito Fernandes lo desatá nan eksperensia riba e bannan di bowling, demostrando nan presishon, téknika i talent stratégiko. Nan a demostrá un trabou den ekipo eksepshonal, un focus firme i un pashon enorme pa e deporte, sigurando partisipashon memorabel. E coach di e tim Roland Rodrigues lo ta presente pa apoyá nan i ofresé yudansa tras di kòrtina. Mesun eksitante, e tim di Special Olympics Curaçao lo kompetí den e deporte kaptivante di bolas bou di guia di coach Dicla van der Veen. Aki tambe dos atleta spesial Ryanella Mathilda i Victor Brown i nan unified partners Dencill Estanista i Julissa Perez lo kombiná strategia, presishon i kompostura pa sòru pa weganan kaptivante yená ku suspenso i e
plaser puru di kompetensia.
Hibando nan talentonan den awa, e landadónan di e tim, Elisa Harmsen i Rodëangelo Willems, a demostrá dedikashon i perseveransa ekstraordinario durante training. Nan ta dominá diferente estilo di natashon, a desaroyá nan resistensia i ta prepará pa duna prestashon notabel, kompletamente den e espíritu di atletismo i e poder di determinashon ku nan coach Suzette Evers huntu ku nan pa apoyo moral. Finalmente, e tim di Special Olympics Curaçao ta brasa e mundu eksitante di powerlifting. Demostrando forsa ekstraordinario, e atleta Jiven Naaldijk a dediká su mes na desaroyá su talent físiko i refiná su téknika di hisamentu di peso. Su forsa i resistensia sigur lo kaptivá su públiko i inspirá esnan ku ta wak rònt mundu bou di guia di su coach Quincy Martina. E biahe di e tim di Special Olympics Curaçao pa Special Olympics World Games Berlin ta marka un logro signifikante den nan karera atlétiko. E ta un testimonio na nan trabou duru, kompromiso i espíritu firme, meskos ku e apoyo inkansabel di nan famianan, coachnan i e komunidat ku ta sostené nan.
E tim di Special Olympics Curaçao lo ke ekspresá su gradesimentu di kurason na nan sponsornan Digicel, MCB i FDDK, ku a hunga un ròl krusial den hasi nan partisipashon den e World Games na Berlin realidat. Nan generosidat i sosten a empoderá e atletanan eksepshonal akí pa bai pa nan soñonan i demostrá nan abilidatnan na mundu kompleto. E tim di Special Olympics Curaçao ta yen di speransa, entusiasmo i determinashon den e kaminda ekstraordinario akí ku nan ta riba dje. Nan partisipashon den e Weganan
Mundial na Berlin ta bon pa rekordá nos tur ku tur hende, no opstante su abilidat, tin e poder pa alkansá grandesa i inspirá otro.
