Ministerio di Asuntunan Eksterior ta sigui e desaroyonan na Haiti hopi di aserka. E situashon den e pais ta sigui deteriorá. Partikularmente den e kapital Port-au-Prince e situashon ta sumamente preokupante.
E ministerio ta enfatisá riba e yamada na e hulandes- i abitantenan di e parti Karibense di Reino na Haiti: mèldu bo mes via di e servisio di informashon. Esaki ta konta tambe pa e personanan ku tin un pèrmit pa estadia legalmente na Hulanda òf un pèrmit bálido pa Aruba, Kòrsou, Sint Maarten, Boneiru, Sint Eustatius òf Saba.
Si bo tin famia òf amigu na Haiti ku ta kumpli ku e indikashonnan aki, por fabor informá nan ku nan mester registrá nan mes. Di e manera aki e Ministerio di Asuntunan Eksterior ta sa ken ta den e pais. I asina por mantené bo alerta riba e desaroyonan i konsehá bo, por ehèmpel ora ta mira oportunidat pa sali for di e pais. Ministerio di Asuntunan Eksterior a buska kontakto via di telefòn ku hulandesnan ku
a registrá nan mes anteriormente komo residente na Haiti. Esaki ta indiká ku na e momentu aki tin un kantidat hopi limitá di hulandes ku ta na Haiti. Te ainda e ministerio no a risibí niun petishon di yudansa for di Haiti.
A aktualisá e konseho di biahe – ku pa algun tempu kaba ta hasi un yamada pa no biaha pa Haiti i bandoná e pais. Reino hulandes no tin embahada na Haiti. Embahada na Santo Domingo, Repúblika
Dominikana, ta duna e servisio pa Haiti, ku sosten di un Kònsùl Honorario Haitiano na Port-au-Prince.
