Dia Mundial di Ambiente a yega un biaha mas i mi kier lansa un yamada di konsientisashon di e importansia kritiko pa kuida nos planeta. E dia aki ta sirbi komo un plataforma poderoso pa kuminsá konsientisá i inspirá akshon pa preservá i protehá nos ambiente. Mi ta firmemente konvensí ku ta responsabilidat di kada individuo, banda di gobièrnu i organisashonnan no gubernamental, pa tuma akshonnan konkreto.

Kambio di klima ta pone un menasá signifikante pa nos ambiente i e bienestar di futuro
generashonnan. Mi ta boga pa implementashon di medidanan ambisioso pa redusí emishonnan di gas, transishon pa fuentenan di energia limpi, i promové práktikanan sostenibel den tur aspekto di bida. Finalisá e proyekto di lei di medio ambiente, otorgá un insentivo fiskal pa outonan di koriente i resiklá na e nivel mas básiko komo ehèmpelnan. Fortifiká akshonnan individuo i inisiativanan kolektivo, ku ta promové uso di energia limpi. Un di e problemanan urgente ku nos ta enfrentá awe ta e disminushon alarmante di biodiversidat. Ta imperativo pa protehá i restourá nos eko-sistemanan pa sigurá un koeksistensia harmonioso entre hende i naturalesa. Proyektonan manera plantashon di palu di mangel mester keda aploudí i sostené. Prevenshon di destrukshon di koral, mester tin un prioridat haltu. Kuida i mantené nos laman i awanan. Adaptashon di nos leinan pa protekshon di nos paranan lokal.

Edukashon ta hunga un papel vital den krea un generashon di siudadanonan konsiente di medio ambiente. Forma nos hóbennan ku konosementu tokante medio ambiente, sostenibilidat, i e importansia di konsumo responsabel. Pone un fundeshi pa un kultura di konsenshi ambiental ku ta traspasá generashonnan. Promé ku tur kos, nos tur mester ta de akuerdo ku Medio Ambiente tin prioridat haltu, pa asina nos por pone nos nanishi den e mesun direkshon. Un man den e otro, na bienestar di nos tur.

error

Enjoy this blog? Please spread the word :)

WordPress Cookie Plugin by Real Cookie Banner