Pa di 3 aña konsekutivo Qredits Boneiru a forma parti di ‘Global Money Week’ organisá dor di Terramar Museum. E aña aki e tema prinsipal tabata ‘protehá bo sèn, sigurá bo futuro’. Esaki no solamente tabata enserá konsientisashon riba kon pa manehá bo sèn pero tambe kualke otro faktornan ku por hasi bo futuro finansiero unu di riesgo. Pa e motibu aki, Qredits a uni forsa ku Cyber Crime Team di KPCN i CBP BES, pa konsientisá e hobenan di MBO riba desaroyonan i risiko aktual ku por strobanan den nan futuro finansiero.
Dia 19 di maart a para ketu na e riesgonan ku krimen sibernetiko ta trese kune. Cyber Crime Team di KPCN, representá dor di señor Ian Steba i Garry Clementina, a duna splikashon i teps pa loke ta e
krimenan mas frekuente bou di hobenan awendia. Esakinan ta ‘Money Mule’ (mula di sèn),
‘Phishing’ i ‘fake account’. Ta viktimá di of partisipe na e tipo di krimenan aki por tin konsekuensia pa futuro finansiero, i Qredits – representá dor di branch manager Milagros Blanken – a duna splikashon
di esaki enfatisando e importansia pa e hobenan protehá nan mes. Dia 22 di maart a duna atenshon na e importansia di un identidat i kon i dikon pa protehá esaki. CBP BES, representá dor di señora Roëlla Pourier, a splika kiko tur ta keda kualifiká komo identidat di un persona, e importansia di protehá esaki i kon e studiantenan por hasi esaki. Milagros Blanken di Qredits a splika dikon institutonan finansiero mester identifiká nan klientenen i kiko ta aspektonan ku ta keda konsiderá. Pa protehá nan mes i tambe e instansia ku ta pidi kopia di un karchi di identifikashon kontra ‘identity theft’ (robo di identidat), Qredits a motivá esnan presente pa uza e app yamá KopieID.
Global Money Week ta un siman den kual diferente organisashon por duna informashon importante i relevante tokante topikonan relatá na maneho di sèn. Qredits komo organisashon aktivo den e sektor finansiero ta haña esaki algu hopi importante i pa e motibu aki a partisipá na tur edishon organisá na Boneiru. Un danki ta bai na Cyber Crime Team KPCN i tambe CBP BES pa e impakto ku Qredits a logra hasi en kolaborashon ku nan e aña aki. Tambe un pabien na Terramar Museum pa e resultadonan realisá e aña aki.
