Ku plaser Bonaire Overheidsgebouwen NV (BOG) ta anunsiá ku el a kumpli ku su obligashonnan statutario pa medio di kompletá su kuenta anual pa e aña ekonómiko 2023 na tempu i laga e akountent renombrá Ernst & Young Caribbean (EY) kontrolá esaki. E kuenta anual pa aña 2023, meskos ku e relatonan anterior, a risibí un deklarashon positivo di akountent, loke ta un testimonio di integridat finansiero i transparensia di BOG. Esaki ta un logro importante pa BOG, mirando ku e ta e promé kompania anónimo bou di e grupo di BHM, ku ta kompletamente na tempu ku su raportahe finansiero, kontrolá pa un akountent eksterno. A kompletá i firma e kuenta anual dia 22 di mart 2024, i seguidamente a ofresé esaki na direktor di BOG.
Ernst & Young i gerensia di BOG a presentá e kuenta anual na Hunta di Komisario di BOG (Raad van Commissarissen, RvC), loke ta suprayá e kumplimentu den su totalidat ku e obligashonnan legal. E direktor gerente statutario Adely Susana-Jansen ku na aña 2020 a keda nombrá pa prinsipalmente
traha riba mehorashon di ‘corporate governance’ di e kompanianan anónimo ku ta kai bou di BHM, ku
orguyo a bisa: ‘Komo entidat ku ta akapará tur e kompanianan, BHM mes ta karga responsabilidat pa
management i atministrashon di BOG. Esaki a kondusí na un proseso bon strukturá pa raportahe
finansiero i ta fortifiká e konfiansa den operashon komersial di BOG.’
