Minister Charles Cooper huntu ku Servisio pa Planifikashon Urbano (ROP) a entrega un pèrmit di konstrukshon na ‘Nijmegen Resort’ i ‘Vredenberg Resort’, pa konstrukshon total di 51 bibienda.
‘Nijmegen Resort’ ta situá na Nijmegenstraat den e bario di Vredenberg/Marie Pampoen. Lo bai konstruí 29 bibienda, dividí den dos edifisio. E resort aki ta un kombinashon di apartamento i kas. E desaroyo ta konta ku un invershon total di 22.3 mion florin.
‘Vredenberg Resort’ ta situá entre e bario di Vredenberg i Marie Pampoen, i aki lo bai konstruí 22 apartamento, dividí den dos edifisio. Durante di ehekushon di e proyekto di konstrukshon aki, lo tene debido kuenta ku desague di awa na Vredenberg, i lo sòru pa sufisiente lugá di parkeo pa e apartamentonan. E desaroyo aki ta konta ku un invershon di 16.5 mion florin.
E desaroyo di bibienda aki den un bisindario sentral, kaminda tin diferente desaroyo komersial, residensial i turístiko. Tantu ‘Nijmegen Resort’ i ‘Vredenberg Resort’ lo bira hoyanan den e área.
Tur dos desaroyo ta kontribuí komo impulso ekonómiko grandi pa Kòrsou. E ta duna un impulso na ekonomia entre otro kreando kupo di trabou na momento di e konstrukshon.
Minister Charles Cooper ta hopi kontentu ku e desaroyonan aki, ya ku e ta ofresé pais un “boost” ekonómiko.
