Minister di Hustisia mr. Shalten Hato, aparte di ta tene un bista fiho riba mantenshon di orden públiko ta tene kuenta tambe ku regla i kondishonnan ku stranheronan ku kier establesé nan mes aki na Kòrsou mester kumpli kuné.
Pa nos ekonomia por sigui krese ta importante pa nos pais atraé mas persona ku ke (bin) invertí den nos país i asina aportá na un kresementu ekonómiko. Invershonista lokal òf esnan internashonal ta mas ku bon bini.
Pero pa e invershonista stranhero ta importante pa e proseso i tambe e kondishonnan ku e mester kumpli kuné ser simplifiká. Kada stranhero ku ta deseá di bin bishitá nos país por keda un maksimo di 30 dia (depende e nashonalidat di e persona e por keda te ku asta 90 dia). Si dado kaso e stranhero ta deseá di prolongá su estadia e por hasi esaki dor di entregá un petishon (toeristisch verlenging) na Servisio di Atmishon ku ta kai bou di responsabilidat di Minister di Hustisia, mr. Shalten Hato.
Aktualmente Minister di Hustisia tin un maneho di pèrmit pa invershonista stranhero ku ta stipulá ku bou di kua kondishonnan speshal un invershonista stranhero por bin na remarke pa un pèrmit di estadia. Un di e kondishonnan aktual ta, ku e invershonista stranhero mester invertí un montante mínimo di mei mion florin. Banda di esaki e invershonista mester demostrá ku e tin e kapital pa kubri e gastunan di (mantenshon di) su invershon i tambe su propio gastunan di estadia.
E maneho aktual di Minister di Hustisia ta enserá ku e invershonista ku invertí un montante di mei mion florin lo risibí un pèrmit di estadia pa un término di tres (3) aña, un invershon di NAF 750.000,00 ta duna e invershonista e derecho di risibi un pèrmit di estadia pa un período di sinku (5) aña. Na momentu ku e período pa kual e invershonista a risibí su pèrmit di estadia vense e por prolongá esaki pa e mesun período ariba menshona.
E maneho nobo lo baha e norma di montante di invershon ku e invershonista stranhero mester kumpli kuné pa asina e por hasi un petishon pa pèrmit komo invershonista. Un invershon di un montante di NAF 250.000,00 ta duna e invershonista stranhero e posibilidat di hasi petishon pa risibí un pèrmit di invershonista pa un término di tres (3) aña. E invershonista stranhero ku invertí un montante di NAF 500.000,00 den un negoshi òf kas lo bini na remarke pa un pèrmit di invershonista di sinku (5) aña.
Un otro posibilidat ku e maneho nobo aki lo brinda ta un pèrmit pa un tempu indefiní na momentu ku e invershonista stranhero invertí un montante mínimo di NAF 1.000.000,00 den un kas òf negoshi. E invershonista por asta pidi pèrmit pa su famia ku konhuntamente ku su persona ta deseá di bin establesé nan mes den nos país. E mester ta trata aki si di su kasá i yunan. Ku kambio di e maneho aki Ministerio di Hustisia ta manda un señal bon kla ku invershonistanan rònt mundu ta mas ku bon biní na nos isla.
E maneho aki ta trese diferente benefisio pa nos país, ya ku invershon den un kompania ta krea mas kupo di trabou, invershon den un kas ta sòru pa trese mas plaka den kaha di gobièrnu dor ku e transakshon aki ta obligá na paga diferente tipo di impuesto manera entre otro ‘overdrachtsbelasting, ‘onroerend goed belasting’ i ta generá divisa pa nos país.
Por último, riba instrukshon di Minister Hato a kuminsa desaroyá òf revisá e kapítulonan di e maneho di entrada i ekspulshon ku tin e meta pa atraé mas invershonista òf personanan ku tin kapital i ta biba di interes (renteniers).
