Kada aña di nobo, nos ta wòrdu konfrontá ku e fenómeno di santu di Sahara for di kontinente di Afrika. E santu akí ta un faktor importante den ekologia mundial komo ku e ta nutri por ehèmpel Amazona ku fertilisante, pero alabes ta influenshá kalidat di nos airu i por okashoná difikultat respiratorio leve serka sierto hende.
Esaki komo ku huntu ku e santu (stòf) tin otro material orgániko i kímiko ku tambe ta sirkulá den airu. E material akí por hasi e alergia di un persona pió òf kousa síntoma di problema di respirashon. Aki algun prekoushon ku nos por tuma.
Personanan ku tin problema ku respirashon i alergia mester tuma e siguiente prekoushonnan durante e dianan ku tin e santu di Sahara riba Kòrsou:
- Keda mas tantu posibel paden ku bentana será.
- Si ta posibel evitá di usa fèn, pasó esaki ta produsí koriente di airu ku ta plama e partíkulanan rònt.
- Laba filternan di èrko di kas i di outo frekuentemente, si ta posibel, tur dia.
- Limpia muebelnan di kas ku un paña muhá pa kita stòf. Evitá di sakudí e paña p’e no plama stòf.
- Si bo ta sufri di alergia, usa e remedinan anti-alérgiko ku dòkter a preskribí bo.
- Tene bentana di outo será i usa èrko mas tantu posibel.
Pa mas informashon por tuma kontakto ku dòkter di kas.
