Quality ta un kompania di ‘IT consultancy’ hulandes ku ya pa algun aña tin un filial na Kòrsou ku ta operá tantu na Kòrsou komo den Karibe. E kompania aki ta spesialisá den strukturashon di IT i duna guia riba e área di teknologia basá riba kada kompania su nesesidat. Tur esaki despues di hasi un evaluashon di e kliente su rekursonan humano, e parti digitalisashon i e diferente prosesonan ku tin den e kompania. Ku nan konosementu amplio riba e área aki Quality sigur ta di gran balor den kresementu teknológiko i digital den un kompania.
Quality su kurason ta bati pa futbòl i ta haña importante pa duna bèk na nos komunidat. Kon mas bunita pa hasi esaki, dor di invertí den nos deporte spesialmente den nos hóbennan ku ta e futuro di mañan. P’esei aña pasá ora e presidente di FFK, Ramiro Griffith, a aserká nan ku e petishon pa spònser e unifòrmnan di nos selekshonnan nashonal hubenil kategoria U-9 te ku U-15, nan no a pensa 2 biaha. Quality a kubri e gastu di 2 sèt di unifòrm blou i blanku pa 4 selekshon hubenil. Mas ku klaro FFK ta sumamente agradesido pa e bunita gesto ku Quality a brinda na nos hungadónan i na e deporte rei, futbòl. Mirando ku nos kuerpo di arbitrahe tambe ta tin mester di un spònser pa unifòrmnan nobo ku nan
lo dirihí nos partidonan aden, Quality un biaha mas a skucha yamada di FFK i a spònser e unifòrmnan di nos rèfrinan. Esaki tambe ta un parti importante mirando ku nan ta kere den liderasgo i guia kual ta netamente loke nos rèfrinan ta ehersé durante un partido di futbòl.
Pues awor nos kuerpo di arbitrahe ta konta ku 90 kamiseta pa nan por usa durante nos partidonan, ku e idea pa den futuro Quality sigui brinda yudansa na nos rèfrinan ku mas ártikulo ku nan lo tin mester i mas ku klaro lo sigui yuda FFK i futbòl di Kòrsou en general. Un biaha mas FFK ta gradisí Quality pa e bunita gestonan aki i ta spera di por sigui konta ku nan pa mas proyekto den futuro.
