E aña akí, Curaçao Export Week ta tuma lugá den e siman di 16 te ku 20 di mei i despues di dos aña porfin e evento akí por keda organisá di forma físiko atrobe. Djaluna 16 di mei, Minister di Desaroyo Ekonómiko, Sr. Ruisando Cijntje a hasi apertura ofisial di Curaçao Export Week 2022. E seremonia di apertura a tuma lugá den ouditorio di Banko Sentral di Kòrsou i St. Maarten kontando ku presensia di entre otro representantenan di International Trade Centre (ITC) ku a yuda desaroyá e strategia, ekspertonan lokal ku tambe a traha riba e diferente strategianan i invitadonan speshal.
Demas eventonan rondó di Curaçao Export Week 2022 ta bai tuma lugá di forma virtual via e plataforma digital interaktivo ‘Hubilo’. Durante henter e siman lo trata tópikonan rondó di e tema di e aña akí kual ta ‘Implementing Our National Export Strategy’ (Implementashon di nos Strategia Nashonal di Eksportashon)
E trayekto pa yega na nos propio Strategia Nashonal di Eksportashon a kuminsá kana ofisialmente for di aña 2019. Apesar ku e pandemia di COVID-19 a stagna hopi desaroyo durante e 2 añanan tras di lomba, MEO a logra finalisá e dokumento akí na aña 2021 den estrecho koperashon ku International Trade Centre (ITC) situá na Ginebra, World Trade Organization (WTO) i tambe mas di 200 eksperto yu di tera. E Strategia Nashonal di Eksportashon di Kòrsou ta karga e vishon pa hasi Kòrsou un pais kaminda negoshinan ta eksitoso (‘Curaçao – where business succeeds).
Kòrsou su Strategia Nashonal di Eksportashon a identifiká seis sektor di prioridat ku tin potensial grandi pa kresementu ekonómiko pero tambe lo tin un balor agregá pa nos eksportashon i generashon di divisa.
E seis sektornan ta: Servisionan teknológiko/IT, Servisionan den kuadro di edukashon, Servisionan Marítimo i di Haf, Ekonomia Blou (Blue Bio Economy), Industria Kreativo i Servisionan Finansiero. Kombiná ku e seis sektornan akí a traha riba diferente strategia adishonal pa sostené komèrsio manera e.o.
- fasilitashon di komèrsio,
- informashon di komèrsio (data konfiabel i aktual),
- promoshon di komèrsio i
- invershon i fortifiká kapasitashon i kompetenshanan pa empresarionan i stimulá ‘entrepreneurship’.
Ademas, e strategia ta bai kondusí na un mihó organisashon den e kadena di balor (value chain) pa e empresario lokal.
E enfoké pa yega na implementashon di e Strategia Nashonal di Eksportashon di Kòrsou ta yega na un momentu apropiá pa Kòrsou, mirando ku nos ta den un trayekto di rekuperashon i tin ku traha riba diversifikashon di nos ekonomia i nos eksportashon. Implementashon di e Strategia akí lo nifiká fortifikashon i diversifikashon di nos ekonomia, mas kupo di trabou, kresementu di invershon i diversifikashon den nos sektor di eksportashon; kual na su turno lo reflehá den un kresementu ekonómiko real pa Kòrsou.
Pa e implementashon di e Strategia Nashonal di Eksportashon di kòrsou ta eksitoso, ta rekerí enbolbimentu di tantu ministerio, nv-nan di Gobièrnu i tambe kompanianan di sektor privá.
Ademas por indiká ku ITC riba nivel tékniko lo keda sostené Kòrsou pa implementá e strategia akí pa sigur 2 aña mas. Huntu ku esaki, empresa i empresarionan lokal i komunidat di Kòrsou tambe mester hinka skouder pa por mira e implementashon di e Strategia akí bira un realidat i asina logra kosnan grandi i duradero pa futuro di nos ekonomia.
