E barku di Marina Hulandes Zr.Ms. Groningen i Wardakosta Karibe Hulandes, riba djaweps mainta a interseptá un transporte di droga durante kual un kantidat di kasi 600 kilo di kokaina a keda konfiská.
E boto sospechoso a keda detektá pa e Sentro Operashonal Maritimo (MOC). Direktamente despues Zr.Ms. Groningen i e avion Dash-8 di Wardakosta a keda aktivá pa interseptá e boto. Ku yudansa di dos boto rápido, modelo FRISC di e Barku Groningen, e barku di Marina Hulandes a logra dominá e boto sospechoso, e asina yamá go-fast a keda obligá pa stòp.
Na momentu ku e botonan FRISC a aserká, e sospechosonan a kuminsá saka paketen for di e boto i tira den laman. Despues di un persekushon largu, ku siñalnan pa stòp i tambe tirunan di atvertensha, finalmente e motornan di e boto sospechoso a keda desaktivá. Den kooperashon ku e Dash-8, binti pakete a kedá saka for di den laman i e sinku sospechosonan, di kua kuater Venezolano i un Kolombiano, a keda detení. Huntu ku e paketenan nan a keda entregá na Kuerpo Polisial Karibe Hulandes (KPCN) na Boneiru. Akinan e paketenan di droga inmediatamente a keda destruí. Siman pasá, e barku di Marina Hulandes ya kaba a interseptá dos boto ku droga. Durante e intersepshonnan akí a konfiská kasi 2.000 kilo di droga.
