Kralendijk (4 di yüli 2023) – Awe WestJet Airlines a anunsiá un buelo nònstòp nobo for di Toronto pa Boneiru, den kolaborashon ku Toronto Pearson International Airport (YYZ), Bonaire Flamingo International Airport (BON) i Tourism Corporation Bonaire. Nan lo ehekutá e ruta nònstòp akí ku ta marka un logro komo e promé buelo di e kompania aéreo pa nos isla, un biaha pa siman riba djamars. E buelonan ta kuminsá dia 12 di desèmber 2023 i ta kontinuá te meimei di luna di aprel 2024.
Esaki no ta solamente e promé buelo di WestJet Airline pa Boneiru, pero e ta tambe e promé buelo nònstòp for di Toronto pa nos isla, di manera ku e merkado kanades tin un konekshon fásil ku Hulanda Karibense. “Nos ta hopi kontentu ku e wenter akí nos por yama bon biní na nos amigunan for di den
nort na nos bunita isla via e ruta úniko akí”, segun Miles Mercera, direktor di Tourism Corporation Bonaire. “Canada ta keda un konekshon importante pa Boneiru i ta den nos tòp 10 di e merkadonan ku ta presta mas mihó. E konektividat históriko nobo akí ta yuda kumpli ku e demanda pa loke ta trata interes turístiko pa nos isla, ku segun espektativa lo solamente oumentá durante e lunanan ku ta bira mas friu.”
“Gustosamente nos ta keda na altura di e deseonan i nesesidatnan di biahe di nos klientenan”, segun Alexis von Hoensbroech, CEO di WestJet Group. “Ku e buelo nobo akí kanadesnan por eksplorá mas lugá den área karibense i kambia e sneu friu di Toronto pa e brisa kayente di Boneiru.”
Ku e promé buelo habrí akí for di i pa Canada, bonerianonan tambe por hasi reservashon pa biaha nònstòp pa Toronto. WestJet ta bai introdusí un inisiativa lokal, spesial pa bonerianonan ku ke eksperensiá Canada, ku un tarifa redusí. “Esaki sigur ta un logro nobo pa nos, i nos ta enkurashá nos komunidat lokal pa hasi uso di e oportunidat akí pa biaha pa Toronto – algu ku promé ku buelo akí tabata hopi mas difísil”, segun Jolinda Craane, diputado di turismo di Boneiru. “E konekshon akí ta bai den dos direkshon, pues e ta un situashon ‘win-win’ pa ámbos destinashon.” “Nos ta hopi kontentu ku WestJet a skohe Boneiru komo nan úniko ruta nobo pa e wenter akí. Kompanianan aéreo tin kapasidat nobo masha limitá pa añadí, pa motibu di un eskases di tripulashon i avion. E anunsio akí ta un prueba di e konfiansa ku nos tur tin den Boneiru i e merkado di Toronto.
E buelo nobo nònstòp akí di tur siman lo ofresé nos pasaheronan for di den área di Toronto i mas leu un konekshon hopi mas mihó ku Boneiru i brinda e sektor di hóreka e transporte aéreo adishonal ku nan tin asina tantu mester di dje. Nos ta hopi kontentu ku na luna di desèmber nos por ranka sali ku e buelo nobo akí for di Toronto ku WestJet, den kolaborashon estrecho ku tur nos stakeholdernan”, segun
Maarten van der Scheer, direktor di Flamingo Airport.
