Despues di tres aña e Konferensia anual pa Konseheronan di Biahe di Hulanda i Bélgika 2022 a tuma lugá físikamente atrobe. E evento a tuma lugá den e wikènt di 20 di mei 2022 na Tiel, Hulanda.
E aña akí Tourism Corporation Bonaire (TCB) tabata e spònser prinsipal di e evento. Durante e
evento ku a dura tres dia e partisipantenan a mira bèk riba e dos añanan tras di lomba, pero
prinsipalmente tambe nan a wak dilanti den direkshon di futuro. E tema di e aña akí tabata
‘Mihó ku nunka’ i esaki a bini bèk den kada presentashon i den kada parti di e konferensia.
Durante e anochi di gala a selebrá e éksitonan eksepshonal di e konseheronan di biahe
individual i a entregá vários premio.
Komo spònser prinsipal Boneiru a keda presentá na e mas ku 200 konseheronan di biahe ku
tabata presente i riba djasabra nos isla tabata e suministradó mas importante den e seshon di
merkado. Durante e seshon di merkado Ryan Hart i nos artista lokal Luis Moka a representá
Boneiru. TCB tabatin e posibilidat pa duna un tayer pa un kantidat di agente di biahe ku tabata
presente. Durante e diferente kòmbersashonnan ku e agentenan di biahe interesá, TCB a duna
splikashon di e ‘unique selling points’ di e destinashon i a hiba kòmbersashon ku nan tokante
vários desaroyo riba nos isla. E agentenan di biahe a reakshoná hopi positivo riba e ‘Bonaire
Bond’ ku resientemente a keda lansá i ku durante e diferente seshonnan a bini dilanti.
Durante e sena di gala Luis Moka, e aktuashon prinsipal, a entretené e agentenan di biahe ku un
presentashon ku a dura 30 minüt. Esaki tabata un bunita oportunidat pa laga e konseheronan di
biahe sera konosí ku e sonido, ritmo i baile boneriano. Durante e sena TCB a presentá tambe e
kampaña nobo di branding ku resientemente a keda lansá.
Mas informashon tokante Travel Counsellors / Konseheronan di Biahe bo por haña riba www.travelcounsellors.nl/nl/leisure
