Art Culture Education Foundation ta kontentu di anunsiá ku mas skol básiko a firma e akuerdo di Edukashon Kultural Artístiko di Kalidat (EKADK). Kolegio Kristu Bon Wardador, Kolegio Streanan Briante, Kolegio Rayonan di Solo, Basisschool Het Koraal, Basisschool Aquamarine i Basisschool De Pelikaan a firma e akuerdo di kolaborashon kaminda ku nan ta bai traha huntu pa introdusí un programa strukturá di arte i kultura den e aña eskolar nobo. EKADK ta trahando duru riba e asina yamá “mapa kultural” kaminda ku provedornan di arte i kultura por inskribí nan mes pa duna lès. Esaki lo bai sosodé den koperashon estrecho entre e grupo di guia di EKADK liderá pa direktor di ACE Foundation sr. Segni Bernardina, e kordinadó kultural interno di kada skol i e provedornan di arte i kultura. Ta asina ku ya EKADK ta konta ku algun artista i lidernan kultural i ya a inskribí nan mes pa e proyekto. Nan ta trahando riba nan plan di lès ku mester wòrdu aprobá dor di EKADK. Despues di esaki nan lo ta kla pa kuminsá
duna lès.
Naturalmente e proyekto ainda ta den su infansia i mester di hopi guia segun e ta madurá. “Den e trayekto aki nos lo duna e coachnan i skolnan e guia ku nan mester i kada dos luna tur skol ta bin huntu pa evaluá e desaroyo di e proyekto” Sr. Bernardina ta enfatisá. Pronto lo lansa e website di Mapa Kultural kaminda ku skolnan por mira e asina yama “Culturuuraanbieders” ku ta tur e personanan ku ta ofresé lès i tayernan riba tereno kultural artístiko. Aki por pensa riba lèsnan di kanto, baile, instrumentonan, kushiná, diseño folklóriko i mas. E plataforma aki ta konektá e skolnan i e ofresedónan di arte i kultura mas fásil. E
plataforma aki lo ta habrí pa otro instansianan ku tambe ke hasi uso di dje.
