Un delegashon di Boneiru a partisipa na e Konferensia di Asosashon di Estudionan Karibense 2023 di 5 pa 9 di Juni na St Croix, Islanan Virgines Estados Unidos. Esaki tabata un evento historiko ya ku ta pa prome biaha e isla di Boneiru a wordu representa. Nos team di Bonaire Human Rights representa pa Davika Bissessar Shaw I James Finies di Nos Kier Boneiru Bek a hasi presentashon I a papia na nomber di pueblo di Boneiru I e organisashonan BHRO, NKBB I Movemento Pa Kambio. Asosashon di Estudionan Karibense (CSA) ta un organisashon independiente profeshonal dedika na promoshon di estudionan Karibense desde un punto di bista multi-disiplinario I multi- kultural. E ta e prinsipal asosashon di akademikonan I profeshonalnan trahando den Region di Karibe, inkluyendo Amerika Sentral I e kosta Karibense di Sur Amerika. E fundadornan di CSA ta Dr Simon B Jones- Hendrickson (bibando na St Croix) I Dr Roland I Peruse (qepd). Nan liderazgo a enkurasha I motiva interes pa mas ku 300 Karibenjos pa formalmente djoin huntu I krea i funda na 1974 e Konferensia anual di CSA. E konferensia CSA 2023 St Croix ku e tema e anja aki: Transformando Nos Karibe ta marka e di 49 aniversario I awor tin mas ku 1100 miembro.
E konferensia kada anja ta wordu organisa den un diferente pais. E anja aki ta pa prome biaha den 47
anja ku e eksepshonal konferensia a wordu tene na e Universidat di Islanan Virgenes Ay Ay St Croix bao di firme liderazgo di destinguido Dra Chenzira Kahina Davis , presidente di e Asosashon di Estudionan Karibense. E delegashon Boneriano tabata tin un tempo hopi fruktifero I produktivo eksponiendo e desigualdat sosial di Boneiru debi na numeroso violashonan di derechonan humano di parti di Hulanda. E delegashon Boneriano un biaha mas a pusha I stimula konsiensa mundial riba akshonan severo inhumano di gobierno Hulandes, manera maneho di imigrashon habri pa migrashon masaal di Hulandesnan ku tambe por vota den 90 dia despues di nan yegada, kreando un fenomeno di “Settlers Colonialism” o kolonialismo di pobla den siglo 21, depopulando I desplaza e Bonerianonan hasi nan minoria riba nos mes isla.
Degradando nos hefenan lokal di departamentonan I remplaza nan ku Hulandesnan Oropeo importa – enfatisando ku desde e disolushon di Antia Hulandes ku mas di 50% di e poblashon a wordu pusha bao di linja di pobreza ets. E hechonan aki a wordu presenta na mundo durante e evento tan espera pa kual a hanja sosten di e audiensa global. Sr Finies a partisipa den diskushon di panel riba “Dekolonisashon den Karibe” . E plenario riba Edukashon Sustenibel pa Projekto di Estudionan di Dependensia: “Kolonialokrasia-nan Karibense”: E prematuridat di Post-Kolonialidat – tabata forma pa destinguido oradonan di Islanan Virgines Britaniko, Guyana Franses, St Maarten I Boneiru ku a wordu presidi pa Dr Carlyle Corbin, Eksperto di Nashonan Uni riba Deskolonisashon. E sinku(5) dianan di plenaria tabata hopi edukativo pa e delegashon Boneriano I a wordu kompleta pa un bunita nochi di gala den kas di gobernado. E honorabel gobernado di St Croix, Albert Bryan Jr I e presidente di Asosashon di Estudionan Karibense Dra Chenzira Davis Kahina a invita e delegashon di Boneiru pa atende e sena I seremonia di Sere I Galardon di e Asosashon di Estudionan Karibense.
Nos tabata hopi emoshona I entretene pa nos anfitriona Dra Chenzira Davis Kahina I Asosashon di Estudionan Karibense I e hendenan di St Croix presentando nan bunita isla I kultura uniko, hospitalidat I maravillanan natural ku tur esnan na e siman di Estudionan Karibense. Tabata un oportunidat inkreibel pa konekta ku lidernan, akademikonan I hendenan di tur parti di mundu. Boneiru a destaka I a hanja atenshon I eksposishon den Karibe I mundial ora ku Bonaire Human Rights Organization a risibi galardon di Asososashon di Estudionan Karibense komo rekonosemento pa abogasia I trabaonan den defensa di derechonan humano di e pueblo Boneriano I pueblonan Karibense na Nashonan Uni I plataformanan internashonal. Nos ta agradesido na nos anfitriona presidente di Asosashon di Estudionan Karibense Dra Chenzira Davis Kahina di e Universidat di Islanan Virgines I gobernador Albert Bryan Jr pa nan kolaborashon I sosten solido I resoluto ku a hasi nos partisipashon un eksito.
