Djabierne atardi diferente mucha a bini huntu pa a gosa di un wikènt fenomenal sin prekupashon na Slagbaai. Trintiun mucha entre 6 i 12 aña di edat a gosa di un wikènt yen di aktividat, organisá pa Rotary Club Bonaire en kolaborashon ku Fundashon Akseso.
Na yegada tur mucha a risibí un tas ku kos nan útil aden pa por a uza den wikènt. Nan a kuminsa na preperá tur lugá di drumi, mientras e guiadó nan tabata preparando un dushi BBQ pa nan. E diferente wega nan ku e guiadó nan di Akseso a trese a keda usá na mesun momentu. E pan ku hamburger drechá a bai manera kuki i despues di e kuminda tabata tempu pa bai sosegá. Tabata un momentu di hopi trankilidat den Slagbaai.
Djasabra mainta e mucha nan a lanta ku hopi gana pa kome algu saludabel. E desayuno a wordu prepará den un tempu kòrtiku pa nan. Despues a yega tempu pa a bisti e vèstnan di sambuyá pa laman i solo. E momentu di mas dushi di e djasabra tabata na momentu di kuminda di merdia. E mucha nan por a prepará nan mesun pizza, danki na chef Floris di restorant Rum Runners. Ku yudandsa di chef Isidoor e
mucha nan a traha nan mesun mansa nan di pizza ku hopi smak i plaser. Nan a traha diferente forma bunita, pa despues kubri nan ku ingrediente di nan eskoho. Solamente e hinkamentu den fornu tabata na man di e guiadó nan. Traha bo mes pizza i kome esaki, kon divertido esaki por ta! Despues di komementu e mucha nan a bolbe bai disfrutá di e dushi laman. Anochi tabata tin un BBQ i despues tabata ora pa bai sosegá atrobe.
Djadumingu mainta e mucha nan a mustra nan entusiasmo pa ranka kabuya i e guiadó nan tabata mas entusiasmá ainda pa motivá nan. E kareda tradishonal di soldachi, unda e muchanan mes a buska nan kandidato nan, tambe tabata un éksito grandi e aña aki. E tim nan ganador di ranka kabuya i di kareda di soldachi a risibí un kòpa na final. Despues di e ultimo kuminda di merdia, tabata tempu pa warda tur kos i tur hende tabata satisfecho pa bai kas. E tim di Rotary ta expresá nan gratitud pa e kontribushon
di Shaedra i su tim di guia.
