Durante añanan hopi famia i kompania a plama den e parti karibense di e Reino. Tin tambe un nesesidat grandi pa hasi biahamentu den e parti karibense di e Reino mas fásil ku ta posibel. Un gran parti di e residentenan ku ta biba den e parti karibense di e Reino ta disponé di un karchi di identifikashon lokal (sédula/Cedula/ID Card). Un parti di nan no tin pasaporte. Antes pasaporte tabata un dokumento di biaha bálido pa biaha paden (i pafó) di e parti karibense di Reino. Tabata eksperensiá e kostonan i e proseso pa hasi petishon pa un pasaporte komo opstákulo pa biaha.
Pa por hasi e biahamentu den e Reino mas simpel, Kòrsou, Hulanda i Sint Maarten a disidí ku entrante promé di mei 2022 residentenan ku e nashonalidat hulandes den Hulanda Karibense, Kòrsou i Sint Maarten por biaha ku solamente nan sédula/ID Card lokal. Pues pa e biahamentu di residentenan di nashonalidat hulandes entre e isla i paisnan aki no mester di un pasaporte mas. Pa habitantenan di Aruba tambe ta vigente ku ta aseptá nan Sédula, na Hulanda Karibense, Kòrsou i Sint Maarten. Sí ta asina ku e kondishonnan usual pa entrada lokal ta i ta sigui na vigor, bou di kua, ku mester tin sufisiente rekurso finansiero pa e estadia riba e isla.
Pa biahenan entre e isla i paisnan (Boneiru, Sint Eustatius, Saba, Kòrsou i Sint Maarten) pa Aruba sí un pasaporte ta nesesario ainda. Pues biaha ku un sédula/ID Card no ta posibel pa Aruba. Estranheronan ku no tin e nashonalidat hulandes pero sí ta disponé di un sédula/Cedula/ID Card di e isla i paisnan partisipante (Boneiru, Sint Eustatius, Saba, Kòrsou i Sint Maarten) no por hasi uso di e posibilidat di e proyekto piloto aki. E medida aki no ta aplikabel tampoko pa biaheronan entre e isla i paisnan partisipante i Hulanda. Pa e tráfiko di biahe aki ainda mester di un pasaporte. E karchi di identifikashon di Hulanda Oropeo tampoko no ta konta komo un dokumento bálido pa biaha entre e isla i paisnan partisipante.
