Boneiru, Sint Eustatius i Saba ta haña un representashon permanente na Den Haag i ta enbolbí e islanan mas trempan ora ta traha riba maneho i lei. E prinsipio di ‘comply or explain’ ta keda e punto di salida pa maneho i lo bai tin diferente nivel di supervishon finansiero pa e islanan. Ku esaki ta hasi adaptashon pa kada isla posibel. Esaki ta algun di e akuerdonan mas importante ku a yega na dje durante e konferensia di trabou di WolBES i FinBES. Durante tres dia na De Bilt, Konseho Insular i Kolegio Ehekutivo di
Boneiru, Sint Eustatius i Saba a diskutí riba revishon di e leinan ku ta regla e relashonnan atministrativo i finansiero entre Hulanda i e tres islanan. Pa enbolbí e islanan mas mihó na momentu ku ta traha lei nobo, ta krea un grupo di trabou riba nivel di ámtenar, ku ta konsistí di representante di Boneiru, Sint Eustatius i Saba i di e ministerio di BZK. Ta enkargá e grupo di trabou pa trese proposishon di kua ta e maneranan pa mehorá partisipashon di Boneiru, Sint Eustatius i Saba den e diferente fasenan di e proseso di maneho i lei. Alexandra van Huffelen: “Mi ta kontentu ku nos por a tene e kombersashonnan konstruktivo akí ku otro den un ambiente ameno. Mi ta konvensí ku e kontribushon balioso di e islanan ta hasi e proposishonnan di lei mas mihó. E tabata un reunion eksitoso den kua nos a yega na un akuerdo riba e kontenido di tur dos lei. Huntu nos lo bai kaba traha nos akuerdonan den e tempu ku ta sigui.”
Fortifikashon di Konseho Insular i Kolegio Ehekutivo
Un di e otro puntonan ku a diskutí riba dje ta e suèldu di miembro di konseho insular, diputado i gezaghèber. Ta subi esaki na un nivel komparabel ku esun di funshonario desentralisá na Hulanda Oropeo. Na momentu di adaptashon ta tene kuenta ku peso di e pakete di tarea di e islanan. Tambe ta tene kuenta ku faktor lokal, entre otro kosto di bida. E funshon di miembro di Konseho Insular ta keda un funshon di tempu parsial (deeltijd). E kantidat di miembro di Konseho Insular ta oumentá gradualmente
entrante e promé elekshon ku ta sigui (2027). Den promé instante di 9 pa 11 miembro na Boneiru, di 5 pa 7 miembro na Sint Eustatius i di 5 pa 7 miembro na Saba. Entretantu lo evaluá si oumento di e kantidat di miembro di Konseho Insular ta nesesario pa e siguiente elekshonnan (2031 i 2035). Konseho Insular ta haña sosten pa por ehekutá su trabou bon. Pa esaki e ministerio di BZK ta pone anualmente un total di €350.000 disponibel pa Boneiru, Sint Eustatius i Saba. Tokante di e kantidat máksimo di diputado a palabrá pa mantené un kantidat di 3 pa 5 diputado pa Boneiru, 3 pa 4 diputado pa Sint Eustatius i 3 diputado pa Saba.
Supervishon finansiero
Den e lei aktual tin un nivel di supervishon haltu. Pa oumentá outonomia lokal, ta introdusí diferente nivel di supervishon riba finansa i presupuesto. E peso di e supervishon ta dependé di e estado di e presupuesto i e maneho finansiero. Ku esaki ta kumpli ku e deseo di e islanan pa diferensia.
Sobrá akuerdonan
Pa e Entidatnan Públiko por ehekutá nan tarea na un manera korekto, e punto di salida ta ku Boneiru, Sint Eustatius i Saba lo mester risibí fondo struktural pa e tareanan struktural. Esaki ta di akuerdo ku e konsehonan di e instituto di investigashon IdeeVersa i di e Konseho di Atministrashon Públiko (Raad voor
Openbaar Bestuur).
E proseso ku ta sigui
Adaptashon di WolBES i FinBES ta nesesario pa mehorá e relashon atministrativo i finansiero entre e Entidatnan Públiko i Hulanda Oropeo. E konferensia di trabou tabata un paso adishonal den e proseso di konsulta tokante e kambio di lei. Ku esaki e islanan tabatin mas tempu pa reakshoná riba e proposishonnan di lei. Despues di e konferensia di trabou e islanan tin tres siman mas pa yega na un reakshon final, formal. Despues, ku e kontribushon di e islanan, ta elaborá riba e tekstonan di lei i e
leinan ta pasa pa e siguiente trayekto. Despues di aprobashon den Konseho di Minister, lo manda e proposishonnan di lei pa konseho pa Konseho di Estado (Raad van State) i despues pa Parlamento (Tweede Kamer).
