Tur aña miembronan di e komishon mes ta hasi un investigashon di manera ku habitantenan di Boneiru tambe ta bini riba e lista di personanan ku ta haña un Kondekorashon Real. Naturalmente e komishon no por ta na altura di tur hende ku ta hasi trabou eksepshonal den nos komunidat. Pa e motibu akí ta hopi esensial pa kada un di nos pone atenshon riba kiko kada un di nos ta hasi den e komunidat akí. Tur kaminda na Boneiru tin personanan ku ta duna hopi di nan mes na komunidat. Den mayoria kaso nan
ta hasi esaki den un forma ku no ta visibel pa otro hende. Lo ta bon si nos por pone e hendenan akí den spòtlait. Bo konosé un hende asina i bo ta haña ku e ta meresé pa públikamente haña un rekonosementu? E rekonosementu mas balioso ta un kondekorashon di reino.
Un kondekorashon ta un símbolo di rekonosementu na un persona pa su aporte personal na òf un prestashon ekstraordinario pa komunidat. Tur hende por proponé un kandidato pa bini na remarke pa un kondekorashon real. Pa proponé un persona for di Boneiru, e persona ei mester ta residente di Boneiru. Si bo ke proponé un hende ku no ta inskribí na Boneiru, e ora ei por fabor tuma kontakto adelantá
ku e komishon pa papia na tempu tokante e prosedura korekto.
Pa entregá un proposishon mester yena un formulario ku un motivashon dikon e persona lo mester bini
na remarke pa haña un kondekorashon. Aparte di e motivashon mester yena tambe datonan di e persona i algun referensia. E petishon aki ta drenta serka e komishon di kondekorashon ku ta konsistí di Lucia Anthony, Jeaninne Wong Loi Sing, Mary Tjin Asjoe, Ada de Palm i Robert Sances. E ora ei den kolaborashon ku Gabinete di Gezaghèber ta sigui traha riba e proposishon.
Despues di esaki gezaghèber ta manda e proposishon ku su konseho pa representante di reino. Representante di reino ta manda e proposishon pa kondekorashon huntu ku su konseho i konseho di gezaghèber pa ‘Kapittel voor de Civiele Orden’. A base di e konsehonan minister di Asuntunan Interno i Relashonnan den Reino ta disidí si ta otorgá un kondekorashon. Si esaki ta e kaso, e minister ta hasi un proposishon na Su Mahestat Rei. Esun ku ta entregá un proposishon mester tin pasenshi. Ta dura un par di luna promé ku tur kos ta kla. Ta importante pa entregá e dokumentunan na tempu pa asina por prosesá e datonan na tempu i pa por pidi informashon adishonal (por ehèmpel un deklarashon
tokante kondukta) na tempu. E fecha final pa entregá proposishon pa aña 2023 ta fin di
yüni 2022. Ki ora un persona ta bin na remarke pa un kondekorashon? Na momentu ku un persona
ta hasi trabou boluntario kaminda su meta ta por ehèmpel pa laga otro hende sinti nan mes bon. Na momentu ku tin un aporte personal òf spesial pa komunidat òf pa e isla di Boneiru. Esei por ta den kaso di trabou boluntario pero tambe den trabou pagá.
Boluntarionan ku pa 15 aña òf mas na un manera inkansabel a duna un aporte na un organisashon riba tereno di por ehèmpel hubentut, hende grandi, ekonomia, deporte, kultura, arte, religion, naturalesa òf òrden públiko ta algun ehèmpel pa por haña un kondekorashon. Un persona ku a logra un prestashon eksepshonal na su trabou tambe por bini na remarke pa un kondekorashon. Importante ta ku e trabou ku e persona a hasi, mester ta na benefisio di komunidat. Pues e no mester ta solamente relevante pa e
organisashon kaminda e persona ta traha, pero tambe pa komunidat. Bo konosé un hende ku bo lo ke proponé pa un kondekorashon, e ora ei bo por download e formulario riba www.bonairegov.com. Pa mas informashon i detaye tokante kon pa yena e formulario, bo por tuma kontakto via telefòn ku sra Lucia Anthony na 777 4202, sra Mary Tjin Asjoe na 770 7603, sra Ada de Palm na 777 1149 òf sra Jeaninne Wong Loi Sing na 786 8549. Bo por manda un email tambe na decoratiecommissiebonaire@gmail.com.
