World Food Travel Association (WFTA) a sertifiká Boneiru komo Kapital Kulinario. Via e programa akí WFTA, un organisashon ‘non profit’ ku nan ta rekonosé komo e outoridat mas prominente na mundu riba tereno di turismo di kuminda i bibida, ta evaluá destinashonnan a base di nan skor riba sinku kriterio kulinario: kultura, strategia, promoshon, komunidat i sostenibilidat. Nan a lansa e programa pa duna amantenan di bon kuminda konfiansa pa biaha bai destinashonnan nobo i inesperá pa kome i bebe, pa medio di evaluá, sertifiká i promové sitionan ku ta laga bishitantenan mira nan gastronomia i kultura
kulinario úniko. Ku un oferta di sena ku ta varia di “chef’s tables” te “foodtrucks”, Boneiru ta e
di dos destinashon ku ta keda honrá komo Kapital Kulinario.
‘Tabata un plaser pa lesa Boneiru su aplikashon, pasobra el a eksponé un kultura kulinario riku
ku anteriormente nos no tabata sa nada di dje’, segun Erik Wolf, direktor ehekutivo i fundadó di
WFTA. ‘Awor sobrá di mundu lo bai tende mas tokante e produktonan i eksperensianan
fantástiko riba tereno di kuminda i bibida ku e destinashon akí ta ofresé.’
E kolaborashon entre tantu sektor públiko komo sektor privá di nos isla, huntu ku sosten di
Bonaire Hotel and Tourism Association (BONHATA), tabata esensial pa eksitosamente
konkretisá e proseso di sertifikashon pa Kapital Kulinario akí.
Miles B. M. Mercera, direktor di Tourism Corporation Bonaire, ta hopi kontentu ku e notisia
positivo: ‘E sertifikashon akí ta un impulso, un ‘boost’ tremendo pa Boneiru i tur e
profeshonalnan ku ta traha duru i ku durante e último añanan a pone e kultura kulinario
diversifiká di nos isla chikitu akí riba mapa’, asina el a bisa. ‘Ta un paso importante tambe den
nos vishon general pa desaroyá i promové nos esena gastronómiko, huntu ku e otro
eksperensianan na nos isla ku ta bai mas leu ku e sambuyamentu sublime ku semper nos tabata
konosí p’é.’
TOKANTE E PROGRAMA DI KAPITAL KULINARIO
‘Culinary Capitals’ ta un programa di sertifikashon i desaroyo pa destinashonnan kulinario. E ta
un presentashon di WFTA, e outoridat mas prominente riba tereno di turismo di kuminda i
bibida. Meimei di aña 2021 ‘Culinary Capitals’ a keda lansá pa yuda destinashonnan kulinario
ménos konosí rekuperá ekonómikamente di e pandemia. Aktualmente e programa úniko akí ta
ganando ‘momentum’, awor ku mas destinashon kulinario rònt mundu ta tumando nota di dje.
TOKANTE WORLD FOOD TRAVEL ASSOCIATION (WFTA)
WFTA ta un organisashon ‘non profit’ ku Erik Wolf, e aktual direktor ehekutivo, a lanta na aña 2001. E organisashon ta haña rekonosementu komo e outoridat mas prominente na munduriba tereno di turismo di kuminda i bibida (konosí tambe komo turismo kulinario i turismo
gastronómiko). Mishon di WFTA ta pa konservá i promové kultura kulinario pa medio di
hospitalidat i turismo. Tur aña e organisashon ta ofresé programanan i servisionan profeshonal
na 200.000 profeshonal na mas ku 150 pais. E trabou i e programanan di e asosashon ta
sinkronisá ku e seis áreanan di práktika mas importante, ku ta inkluí kultura, sostenibilidat, biña
i bibida, agrikultura i kunuku, bienestar i salú i teknologia.
