Wardakosta, Polis i otro outoridatnan kompetente lo bai hasi kòntròlnan riba laman i na nos
kostanan djadumingu 7 di yanüari durante e Fuikdag 2024. Meta di e kòntròlnan akí ta pa
garantisá ku personanan ta mantené nan mes na e medidanan ku Gobièrnu di Kòrsou a stipulá
pa e dia aki, i pa mantené òrdu públiko. Wardakosta ta informá doñonan di botonan di plaser,
‘charterboats’ i seadoo pa tene kuenta ku e medidanan ku ta bálido riba e dia akí.
Abase di e medidanan; no ta permití benta di alkohol durante Fuikdag, no ta duna pèrmit pa
músika públiko riba vlὸt of pódum, tur boto ku ta partisipá na e evento mester tin nan
dokumentonan bálido di nabegashon. Tambe mester tin sufisiente vèst di salbabida abordo
konforme e kantidat permití di pasahero, además artefaktonan apropiá di señal i flùit mester tei
na bordo. Lo tin kòntròl riba tur e rekistonan akí di boto dor di ‘Haven en Veiligheid Inspectie’ i
Wardakosta. Ademas Servisio di Bombero lo efektúa kontrὸl pa loke ta sendementu di kandela
abordo di boto pa preparashon di BBQ. Despues di 5’ or di atardi no ta permití pa sigui toka
muzik i despues di 5’ or di atardi lo bai tin kòntrolnan na bahianan pa evita aglomerashonnan na
playa.
No ta permití e asuntu di hiba i trese hende, ku otro palabra hende ku tin nan propio boto so por
yega Fuikbaai. E medida akí ta nesesario pa motibu ku hendenan ku tuma ‘kabe’i boto’ ta keda
pegá na Fuikbaai sin por yega Caracasbaai mas. Konsekuentemente nan ta purba kana via
tereno privá di Santa Barbara pa yega siudat. Tur esaki unikamente ta kontribuí na mas kaos i
komo tal no ta keda tolerá.
Tur boto ku ta bin di otro pais i bin bishitá Kòrsou ta obligá di pasa imigrashon i Duana pa ‘klaar
in’. Wardakosta, Kuerpo Polisial i demas outoridatnan kompetente i enkargá ku mantenshon di
òrdu públiko lo atendé debidamente kontra tur esnan ku no tene nan mes na e medidanan
menshoná.
Outoridatnan ku lo ta presente pa kòntrolá durante Fuikdag i duna asistensha riba e dia akí ta,
Wardakosta, Kuerpo Polisial, ‘Haven en Veiligheid Inspectie’, Brandweer, Duana, Santa
Barbara Security, Rode Kruis, Fundashon Kuido Ambulance Kòrsou i Citro.

error

Enjoy this blog? Please spread the word :)

WordPress Cookie Plugin by Real Cookie Banner