Studiante di e parti karibense di Reino ku ta bai studia na Hulanda na un skol superior òf universidat for di sèptèmber ta risibí un beka básiko atrobe. Eerste Kamer awe ku sosten amplio a bai di akuerdo ku e proposishon di lei pa e reintrodukshon di e beka básiko den enseñansa superior. Studiante ku tin derecho
riba esei, for di djaluna 19 di yüni por pidi un beka básiko na DUO.
Minister Dijkgraaf: “Pa studiante e regreso di e beka básiko pa studiante na hbo i wo ta nifiká un mehorashon grandi di nan posishon finansiero. E ta ofresé perspektiva i un bon base. I huntu ku e ampliashon di e beka adishonal un suma fiho pa luna ta pèrkurá pa mas trankilidat finansiero serka studiante. Mi ta haña importante tambe ku, ku e proposishon di lei aki e régimen di paga bèk pa studiante di mbo ta bira igual na esun di studiante na skol superior i universidat. Esaki ta konta tambe pa e límite di gana sèn èkstra. Asina nos ta yega na un posishon mas igual pa studiante di mbo.
Pidi beka básiko
Pa risibí un beka básiko studiante mester hasi un petishon serka DUO, ku e tempu ku a pasa a traha duru pa hasi e reintrodukshon posibel. Tur (futuro) studiante ku tin derecho riba un beka básiko, ta haña un mensahe personal di DUO. Pa studiante karibense e siguiente ta konta:
Studiante ku ta na Hulanda kaba i ku tin un number di servisio sivil (bsn) i un DigiD,
por pidi e beka básiko for di 19 di yüni via Mijn DUO.
Futuro studiante ku ta den e área karibense ainda i ku a pidi finansiamentu di estudio
kaba, por pidi e beka básiko via e formulario Aanvragen basisbeurs voor studenten
hoger onderwijs uit het Caribisch Gebied (Pidi beka básiko pa studiante di enseñansa
superior di e Área karibense). Nan ta risibí e formulario e siman aki via un meil.
Futuro studiante ku ainda ta den e área karibense i ku ainda no a pidi finansiamentu
di estudio, por pidi e beka básiko i otro parti di e finansiamentu di estudio via e
formulario Aanvragen studiefinanciering hoger onderwijs voor studenten uit het
Caribisch gebied (Pidi finansiamentu di estudio pa enseñansa superior pa studiante di
e área karibense). Por download e formulario aki na www.duo.nl/antillen.
E sumanan
Studiante na hbo i wo tin derecho riba e beka básiko si den e aña di estudio 2023-2024 nan bai studia pa promé bia òf si e ora ei ainda nan tin derecho riba finansiamentu di estudio den forma di un beka di logro. Studiante ku ta biba for di kas ta risibí € 274,90 pa luna, studiante ku ta biba na kas € 110,30. Den e aña di estudio 2023-2024 pa durashon di un aña pa tur studiante ku ta biba for di kas (tambe den mbo) ta bini € 164,30 pa luna aserka pa motibu di e oumento grandi di gastu di entre otro kompra i energia. Un studiante ku ta biba for di kas pa e motibu ei na sèptèmber ta risibí un total di kasi € 440 na beka básiko, pa henter e aña di estudio 2023-2024 esaki ta un total di sigur € 5.200.
Amplia e beka adishonal
Pa studiante e beka básiko no ta e úniko fuente di entrada. Pensa na un djòp den banda, supsidio adishonal di kuido i hür, un kontribushon di mayor i eventualmente fia serka DUO. Pa sosten finansiero èkstra studiante di entrada abou òf mediano tambe por apelá na e beka adishonal. Ta amplia e límite di entrada di mayor te por lo ménos € 70.000, pa asina mas studiante por kleim un beka adishonal. Esei ta oumentá e igualdat di oportunidat den enseñansa. For di sèptèmber e beka adishonal maksimal ta € 416 pa luna.
Kondishon igual ora di paga fiansa di estudio bèk
Pareu ku e re-introdukshon di e beka básiko minister Dijkgraaf ta hasi e régimennan pa paga fiansa di estudio bèk igual pa studiante di mbo, hbo i wo. Asina ta trese mas igualdat entre e tiponan di enseñansa aki. Aktualmente ainda e régimennan ta diferente pa di un banda mbo (i studiante di enseñansa superior di e sistema bieu di beka) i di otro banda e hbo i wo: tin diferente plaso pa paga bek (respektivamente 15 i 35 aña) i diferente kalkulashon di e interes. E hasimentu igual di tur manera ta konta pa studiante nobo di mbo. Studiante di mbo ku ta studia kaba (i ku despues di promé di ougùstùs ta haña finansiamentu di estudio tambe) por skohe entre e sistema bieu i esun nobo. Es ku no skohe, komo studiante mbo outomátikamente ta pasa pa e régimen di paga bèk di 35 ana. Pa studiante di enseñansa superior e régimen di paga bèk no ta kambia.
Kompensashon
E regreso di e beka básiko ta nifiká e fin di e sistema sosial di fia. Komo gesto den direkshon di studiante ku a studia un òf vários aña bou di e sistema di fia ta bini un kompensashon. Pa un temporada di estudio (nominal) di 4 aña ta trata di € 1.436 pa studiante. E kompensashon aki tambe ta pa studiante ku no a haña finansiamentu di estudio. Ademas mas o ménos 375.000 studiante ku a studia di 2015/16 te ku 2018/19 ta risibí un kompensashon èkstra komo remplaso di e voucher di e adelanto di estudio di mas o ménos € 1.835. Ta paga esaki òf kit’é di nan debe di estudio.
