Retonan ku sindikalismo na Boneiru lo bai enfrentá den 2024 ta sigur pa trese
mas kambio na bienestar di e klase trahadó i su famia. Un di e leinan ku sigur
sindikalismo lo pusha pa keda entrodusi na 2025 ta e lei ku ta regla desempleo.
Na e momentonan aki no tin un lei ku ta regla entrada maske ta temporal pa e
trahadó ora e pèrdè trabou. Un trahadó asina ta kai den un burako finansiero
huntu ku su famia. Ta asina ku si su partner ta traha i ta risibí sueldo minimo o
mas, e trahadó ei no ta bin ni na remarke pa haña ònderstant. Pues e lei ei
mester drenta na vigor 1 di yanüari 2025.
Otro lei ku sindikalismo lo sigui pusha pa bin na vigor ta e lei ku ta regla ora un
trahadó mester bai komo kompañante di un hende yegá di dje den eksterior pa
kuido médiko avansá. Te na e momentonan aki un trahadó asina ta pèrdè su
entrada pa e temporada ku e bai afó òf e tin ku tuma su dianan di vakashon òf e
ta kompletamente na merset di su dunadó di trabou ku si esaki kier sigui pag’é
su dianan ku e ta ousente na trabou. E idea ta pa regla den lei ku un trahadó
asina ta bai kai bou di e mesun areglo ku komo sifuera e tabata ao, esta
inkapasitá pa traha debí na malesa. E regla ta ku e dunadó di trabou ta mèldu e
trahado ku tin ku kompañá un hende malu pa eksterior na portal di SZW i e
dunadó lo risibí kompensashon di 80% di e salario pa dia di e trahadó. I manera
ta e kaso ora di malesa, e dunadó di trabou lo por paga e trahadó 100% di su
salario durante e temporada ku e ta ousente pa kompañá un hende malu.
Naturalmente e lei aki lo ta mará na kondishonnan.
Otro lei na fabor di trahadó ku sindikalismo ta bai pusha riba dje ta pa hasi pago
di vakantieuitkering obligatorio pa lei. Na e momentonan aki e pago di
vakantieuitkering ta resultado di negosashon entre sindikato i e empresa na unda
e sindikato tin representashon. E intenshon ta pa ankra esaki den lei mará na un

sierto porsentahe. Pensamentu di sindikalismo ta pa e porsentahe aki ta minimal
8.33% ku ta ekivalente na un luna di salario.
Un otro lei ku sindikalismo kier trese un kambio fundamental den dje ta esun di
rekonosimentu di sindikato komo representante legal pa negoshá kondishonnan i
sirkumstansianan laboral di e trahadó na un empresa. E lei aki lo mester
remplasá e lei aktual di referèndum. Mirá for di e punto di bista ku trahadó tin e
derecho konstitushonal pa organisá su mes libremente den un sindikato, nos ta
kere ku ta mas ku hustu ku si den un empresa ku minimal un x kantidat di
empleado, un empresa asina lo mester rekonosé un sindikato. E detayenan di un
lei asina lo ser anunsiá mas lat den aña.
Tambe sindikalismo lo bai traha riba dos lei mas, esta un lei ku ta deklará un
kontrato kolektivo bálido pa sektor. Por ehèmpel ku si negoshá un Cao den e
sektor hotelero ku un hotèl por pidi minister pa deklará e cao ei vigente i bálido
pa henter e sektor. Aki tambe mester bai na elaborá e detayenan.
Finalmente, manera tur e partidonan polítiko den e último kampaña a trese dilanti
i tambe tantu e koalishon MPB/UPB komo esun aktual di PDB/M21/Vrolijk a pone
den nan programa di gobernashon i di koalishon. Esta mester bai traha huntu pa
entrodusí un penshun general pa tur trahadó banda di e penshun di behes. Den
esaki nos tin un ehèmpel ku por yega na un penshun asina i e ehèmpel ei ta na
na nos hermana isla Aruba.
Tambe sindikalismo lo bai konsiderá e rekomendashonnan ku a keda formulá
den rapòrt ku a analisá Kontraktonan Kolektivo riba islan BES riba e aria di
leinan laboral.
Tur e kambionan aki en prinsipio lo ser poné riba agènda di Diálogo Sentral pa
keda kargá pa e tres pilarnan di nos desaroyo sosial-ekonómiko, esta gobièrnu,
sektor empresarial i sindikalismo. Ketu bai e lema ta union ta forsa. Nos ta
spera ku e union aki lo manifestá su mes tambe den sindikalismo na Boneiru i
speshalmente bou di e klase trahadó ku den 2024 masalmente mester organisá
su mes den sindikalismo.

Nòchi Willem, konsehero di Union Sindikal Boneriano, USIBO

error

Enjoy this blog? Please spread the word :)

WordPress Cookie Plugin by Real Cookie Banner