Selibon tin añanan kolektando bòter di glas separá i ta depositá esaki na un sitio separá. Ta kolektá glas na negoshinan, plenchinan di medio ambiente i na sitionan públiko i na Sentro di prosesá shushi.
Selibon, lo instalá un mashin pa prosesá bὸter di glas. E mashin aki tin e kapasidat pa polvorisá
e glas den santu. Ku otro palabra: e mashin por kibra bὸter di glas na diferente tamaño. E bὸter
di glas por bira chikí, manera santu òf manera piedra grandi (greis).
Na e momentonan aki, ta kolekta e bὸter di glas ku un vehíkulo spesial i transport’é na e Sentro
di Prosesá shushi na Lagun. Ta almasená e bὸter di glas temporalmente na un sitio separá. Pronto, ku e mashin nobo por prosesá esaki mesora. Lo usa e produkto final komo material adishonal den sektor di konstrukshon, den asfalt òf komo un tipo di greis. E planta di prosesá bὸter di glas lo bai krea 5 kupo di trabou. Huntu ku plenchi di trabou lo selekshoná personanan lokal pa operá e planta. E personanan aki lo risibí un kurso spesial, adaptá na e sirkunstansia pa efektivamente operá i mantené e mashin. Den e kuadro aki tambe lo tene kuenta ku tur e aspektonan di seguridat.
