Sekretario di Estado Alexandra van Huffelen di Relashonnan den Reino lo hasi un
bishita di trabou for di 30 di sèptèmber te ku 5 di òktober na Sint Maarten, Kòrsou i
Boneiru. E bishita prinsipalmente ta marka pa e aña di konmemorashon di pasado di
sklabitut. Asina, e lo partisipá na un seshon di Catshuis na Sint Maarten huntu ku
representantenan di tur seis isla i lo e ta na Kòrsou pa e rehabilitashon di Tula.
Ademas, e Sekretario di Estado lo hiba kòmbersashonnan atministrativo na Boneiru
tokante di e leinan ku ta regulá e relashonnan atministrativo i finansiero entre
Hulanda Europeo i Hulanda Karibense, e WolBES/FinBES.
Sint Maarten
E bishita di trabou di Sekretario di Estado Alexandra van Huffelen ta kuminsá riba djasabra
30 di sèptèmber na Sint Maarten ku un enkuentro ku promé minister Jacobs. Riba 1 i 2 di
òktober, e seshon di Catshuis lo tuma lugá, kaminda e Sekretario di Estado lo papia ku
representantenan di Kòrsou, Aruba, Sint Maarten, Boneiru, Saba i Sint Eustatius tokante e
influensia di pasado di sklabitut i kon ta duna kontenido na e aña di konmemorashon di
pasado di sklabitut. Un parti spesial di e enkuentro aki ta un seshon di ‘break-out’ ku e
parlamento hubenil di Sint Maarten.
Kòrsou
Riba e anochi di 2 di òktober, Sekretario di Estado Van Huffelen ta bai Kòrsou. Riba 3 di
òktober, e ta papia ku Hendenan Muhé di Kòrsou tokante, entre otro, e influensia di pasado
di sklabitut. E dia ei tin tambe enkuentronan ku promé minister Pisas i Gobernador planiá, i e
anochi ta dediká na rehabilitashon di Tula, kende na 1795 a liderá e gran rebelion di
sklabitut na Kòrsou.
Durante e bishita na Kòrsou, tambe tin plania un bishita na Swaen Village, un enkuentro ku
organisashonnan ku ta komprometé na sirbi e komunidat LHBTQI+ na Kòrsou, un
kòmbersashon ku studiantenan di ekonomia di Universidat di Kòrsou i un mini-konferensia
ku e sektor sosial.
Boneiru
Durante e bishita na Boneiru riba 5 di òktober, e Sekretario di Estado lo tene
kòmbersashonnan atministrativo tokante di e leinan ku ta regulá e relashonnan
atministrativo i finansiero entre Hulanda Europeo i Hulanda Karibense, esaki ta, e
WolBES/FinBES. Den e kuadro aki, e ta sinta na mesa ku e grupo di trabou
WolBES/FinBES, Kolegio Ehekutivo i Konseho Insular.
