Dia 8 mart awor ta hasi un aña ku èks minister di GMN, Dorothy Pietersz-Janga a baha despues ku direktiva di partido MFK no tabatin konfiansa mas den su persona. Frakshon diMAN/PIN ta komprondé ku MFK mester a buska un solushon temporal i promé minister, Gilmar Pisas a disidí pa splet e Ministerio di GMN, unda direktoradonan di naturalesa i medio ambiente a kai bou di minister Pisas i salú públiko bou di e responsabilidat di minister di Finansa, Javier Silvania. Un desishon manera salami, ku a keda para te awe ku tur e konsekuensianan ku esaki tin pa e situashon fragmentá den sektor di kuido médiko na
Kòrsou.

Nos pais mester di un minister ku dedikashon kompleto na salubridat públiko, medio ambiente i naturalesa i no e situashon aktual kaminda nos ta drei pa kasi 1 aña kaba bou di dje ku ministernan ku ta okupá e funshon “part time”. Maneho despues di e krísis okashoná pa e pandemia di COVID-19 mundu a ripará kon importante ta ku tin un bon maneho i vishon pa salú di un pueblo. Algu ku lamentablemente
bou di e gabinete Pisas no tin! No tin un maneho pa atendé ku retonan di salú di nos pais. 3 aña kaba Kòrsou ta sin un programa di prevenshon i konsientisashon riba malesanan króniko den nos pais. No tin ningun maneho dirigí tampoko pa krea hóbennan mas salú meskos ku no tin un maneho pa garantisá ku adultonan mayó tin e konosementu propio pa kuida nan salú mas mihó posibel. Ta parse ku pa minister Javier Silvania e úniko kos importante ta, parti sèn sin ningun vishon real duradero. CMC Te ainda no a atendé tampoko ku e kurason di nos kuido ku ta Curaçao Medical Center (CMC). MAN/PIN ta kontentu ku tantu Advent Ziekenhuis komo Pain Clinic (CIC) tei komo klínikanan satélite den nos kuido manera tabata e vishon for di 2012. Pero e manera di minister Silvania pa atendé ku e kurashon di kuido médiko tampoko ta unu sano pasobra na lugá di krea union e ta instigá desunion entre e diferente institutonan.

Esaki no por ta aktitut di un mandatario ku mester tin komo meta pa krea sinergia i union den pais.
HAP ku hopi hubilo a habri e ‘huisartsenpost’ (HAP) 1 yanüari último i MAN/PIN ta kontentu ku porfin e gobièrnu a kontinuá ku e plan inisial for di di 2020 pa habri un HAP. E plan tabata pa habri e HAP den CMC pero pa motibu di e pandemia di Covid-19 ku tabatin prioridat i falta di fondo no a logra ehekutá e plan aki e tempu ei. Pero ta parse ku minister Silvania no habri e HAP pa e sirbi su meta real, esta mehorá kuido den e promé liña i krea efisiensia. Pa e minister aki e HAP ta mas bien un otro intento pa skor polítikamente kuné. A habri e HAP sin ningun kampaña di informashon riba nivel di gobièrnu manera un kambio den servisio di kuido di e índole aki meresé. Pashèntnan mester sa ta unda mester akudí den kasonan di urgensia den oranan di anochi i den wikènt. Tambe a habri e HAP sin ku a yega na un
konsenso general riba partisipashon di dòkternan di kas den esaki.


Konsekuensia ta otro divishon di sektor di kuido, den e kaso aki bou di dòkternan di kas ku posiblemente por kaba den oro kaso den korte kontra gobièrnu. INFLUENZA i COVID-19 Ayabanda e otro minister “part time” di Salubridat, Minister Pisas ta deklará den un programa radial ku nos no mester drenta pániko pa e kantidat grandi di kasonan di infekshon ku viro di Influenza (“griep”) i viro di Covid-19. E siguiente dia sinembargo minister Pisas mes ta emití un komunikado i manda tur hende pasa e bakuna kontra Covid-
19 i Influenza. Esaki ta otro muestra di e konfushon ku e fragmentashon den maneho di kuido ta trese kuné. Miéntras ku profeshonalnan den e sektor ta katalogá e situashon aktual por bira un epidemia ku ta meresé suministro di informashon konfiabel i struktural pa konsientisá poblashon kon mas mihó protehá nan mes. Miéntras esaki no tuma lugá ta sektornan den nos komunidat ta esun ku ta sufri. Na kantidat di empresa i servisionan publiko tin problema pa duna servisio pasobra parti grandi di trahadó ta malu na kas. Konsekuensia ta ku individualmente instansianan manera Banko di Seguro Sosial, SVB i Biblioteka Nashonal di Kòrsou ta obligá klientenan pa bisti tapa boka. MAN PIN ta konkluí ku e falta di nòmbra un minister dediká na salú a kondusí na un salubridat públiko kibrá na wiri wiri i ta muestra ku e gobièrnu aki no tin ku nes ku salú di nos pueblo!

error

Enjoy this blog? Please spread the word :)

WordPress Cookie Plugin by Real Cookie Banner