For di e di dos mitar di 2021 ekonomia di Kòrsou a bin ta mustra un rekuperashon supstansial. Kòrsou mester utilisá e periodo di rekuperashon aki pa strukturalmente pone su presupuesto strukturalmente na òrdu, i durante e proseso aki, e mester kontrolá su gastunan. Den su kòmbersashonnan resien ku gobièrnu di Kòrsou,
Kolegio di supervishon finansiero pa Kòrsou i Sint Maarten (Cft) a urgi esaki. Kòrsou ta redusiendo su défisitnan di mas aña entre otro komo konsekuensia di e progreso ku ta logrando ku kobransa di impuesto, pero e desafionan ta keda grandi. Mundialmente inflashon a subi konsiderablemente i estorbonan kontínuo den e kadena logístiko por pone preshon riba e rekuperashon. Redukshon di e debe nashonal te na un nivel aseptabel tambe ta keda un problema. Ademas mester introdusí reforma pa por sigurá durabilidat di e sistema di kuido i e sistema di seguro sosial pa futuro. Pa e motibu aki,
apesar ku Kòrsou ta logrando entradanan di impuesto mas haltu, kòntròl di su gastunan
i introdukshon di reformanan ta keda di sumo importansia.
Pa e aña aki Banko Sentral di Kòrsou i Sint Maarten ta kalkulá un kresementu ekonómiko real di
5,2 porshento. IMF ta kalkulá pa 2022 un kresementu ekonómiko di 6,5 porshento. E espektativa
ta ku den 2022 inflashon lo subi te riba 6 porshento. Den 2022-2023 ekonomia ta yega bèk na e
nivel di promé ku e krisis di COVID-19. Añanan largu durante di kua ekonomia a bai atras, huntu ku un debe nashonal kresiendo, tabatin un efekto hopi negativo riba e finansa públiko. E debe nashonal di Kòrsou aktualmenta ta e montante di ANG 4,3 miar. Esaki ta 84 porshento di GDP (produkto interno bruto). Kòrsou ta pará dilanti di un desafio grandi pa redusí su debe nashonal i hiba esaki mas lihé posibel na un nivel sostenibel. Un kombinashon di e reformanan den e Pakete Nashonal, un maneho presupuestal
estrikto, disiplina presupuestal rígido i redukshon struktural di e gastunan den sektor públiko,
kuido i seguro sosial mester hiba na redukshon di e debe nashonal.
Presupuesto 2022 i 2023 Kòrsou ta trahando riba un adaptashon di presupuesto a base di kua lo redusí e défisit riba servisio komun (gewone dienst) te ANG 123 mion (2,3 porshento di GDP) den 2022, miéntras ku for di 2023 lo realisá un surplus. E surplus entrante 2023 ta di importansia, pasobra ta ku e montante
aki por kuminsá paga e debe. Tantu e défisit ahustá di 2022 di ANG 123 mion komo e surplus kalkulá di ANG 8 mion (0,2 porshento di GDP) den 2023 ainda ta frágil.
En parte e karakter struktural insigur di e entradanan di impuesto aktual i e retonan den e sektor di kuido i seguro sosial, ta pone ku kòntròl di gastu – entre otro di gastunan di personal (overtaim) i produktonan i
servisionan – ta keda di gran importansia. Kòrsou mester limitá mas tantu posibel den tempu
medidanan insidental ku ta kondusí na pèrdida di entrada, manera kompensashon di e preisnan di kombustibel. Si no, lo mester bini ku medida pa kompensá e pèrdida di entrada aki. Na mes momento mester implementá ku hopi determinashon medidanan pa subi entrada, manera introdukshon di pago pa pèrmit pa kompanianan ku ta brinda serevisio di weganan di azar (hazard)..
