Sindikalismo na Boneiru parti 44, 20 novèmber 2023
Hopi positivo e eksperensha ta ku poko poko pero sigur sierto dunadónan di trabou i
sigur esnan ku sentimentu sosial ta realisá ku loke ta pasando, esta e rehabilitashon di
un merkado laboral ku ta pagando un sueldo mínimo na drechi ta algu ku ta na
benefisio di un desaroyo sosial -ekonómiko positivo di Boneiru. E desishon aki ta krea
un ambiente di i na trabou di por fin hustisia i ku por fin e palabranan trabou tin ku paga
a haña kontenido real. E desishon aki a krea un oportunidat úniko pa porfin
empresanan implementá un algu ku pa hopi tempu sindikalismo a bin ta boga pe, esta
krea un kas salarial den e empresa. Kiko ta un kas salarial? Un kas salarial
simplemente ta un sistema den kual den un forma transparente bo ta deskribí tur e
funshonnan den bo empresa. E ta sirbi komo un sorto di kapstòk pa bo evaluashon di
funshon; pa planifikashon di bo personal; pa e karera laboral di un trahadó den bo
empresa i otro desaroyonan riba tereno laboral den bo empresa. Ora bo tin e sistema
aki den bo empresa e trahadó sa presis na unda e ta drenta den bo empresa, esta den
kua funshon, kuantu salario tin mará na e funshon ei, kon e ta krese den e funshon den
un forma vertikal a base di oumento periódiko i kon e por krese horizontal, esta haña
promoshon di un funshon pa otro den e empresa. Pa loke ta e kas salarial un empresa
por skohe entre un sistema será òf un sistema habrí. E sistema será ta ku kada funshon
ta mará na un skal i den e skal ei tin un kantidat di trapi ku durante su karera e trahadó
por subi te yega na un máksimo den e skal ku e ta. Den un sistema habrí ta traha ku un
minimo i un máksimo i e forma ku e trahadó ta progresá ta a base di oumento salarial
basá riba un sistema di prestashon.
Den e kaso di oumento di sueldo mínimo entrante 2024 kualkier sea e sistema ku e
empresa ta usa e ta sagudi henter e kas salarial. Primeramente e sueldo minimo lo ta
1570 dòlar na yanuari 2024 i lo bira 1750 dòlar na luna di yüli 2024. Esaki ta nifiká ku
tur trahadó ku tin un trabou fulltime, esta 40 ora pa siman ku ta 173.3 ora pa luna
mester risibí e sueldo minimo. Ku otro palabra tur trahadó ku aktualmente ta gana 1236
dòlar( e sueldo minimo aktual), entrante yanuari 2024 mester mira riba su slep ku su
sueldo a bira 1570 dòlar. E oumento aki lo tin konsekuensia natural pa tur e sueldonan
ku aktualmente lo ta pegá ku e suelo minimo nobo òf ku ta algu mas ku e sueldo
minimo nobo. E salarionan aki tambe mester move den direkshon di bai ariba.
Trahadónan ku ta organisá den un sindikato tin e sindikato pa na mesa negoshá esaki.
Trahadónan ku no ta organisá den un sindikato no tin e forsa aki. Pues den e situashon
aki un biaha mas esnan ku kier mira i skucha a haña e prueba di e balor agregá ku ser
miembro di un sindikato tin pa nan. Nos ta spera ku e logronan sindikal aki ta motibu
sufisiente pa trahadónan den e sektornan manera horeca, konstrukshon, vigilansha,
komersio, esta pakusnan realisá ku si nan keda para pafó trein ku bùs tur ta pasa bai
laga nan i ku nan lo no disfrutá ni benefisiá di e bentahanan ku ser miembro di un
sindikato ta brinda.
Djarason awor tin elekshon pa Tweede Kamer aki na Boneiru tambe. Si bo kier hasi uso
di bo derecho di voto informá bo mes bon kon polítika di Ulanda ta funshoná i kiko tur e
partidonan politiko ta para pe. Ku e informashon ei bo por evaluá kua partido i o kua
kandidato lo nifiká un balor agregá pa Boneiru su desaroyo sosial-ekonómiko. I manera
semper sindikalismo no ta duna konseho di pa ken bo mester vota sino solamente por
konsehá pa bai vota i hasi uso di bo derecho di voto. Si bo no kier vota pa bo
motibunan tambe ta algu ku sindikalismo ta respetá. Al fin al kabo e derecho di voto ta
un derecho di abo i solamente di abo. I ta abo so ta esun ku ta disidi kiko bo ta hasi ku
e derecho ei.
