Willemstad- Djaluna, 8 di mei 2023, porfin nos por a bolbe yama bon biní na dos di e barkunan di fruta i bèrdura for di Venezuela despues di sinku (5) aña ku fronteranan entre Kòrsou i Venezuela a keda será. Ministerio di Desaroyo Ekonómiko (MEO) ta sumamente kontentu ku e desaroyo akí, mirando ku presensia di e barkunan Venezolano pa añanan tabata parti di nos atrakshonnan turístiko den sentro di siudat i alabes opshonnan di fruta i bèrdura na un preis ekonómiko pa Pueblo di Kòrsou. Durante un aktividat ameno riba e mainta akí, Minister di Desaroyo Ekonómiko, Ruisandro Cijntje, a hasi entrega di pèrmitnan di ‘standplaats’ na e kapitan di e dos barkunan akí pa asina ofisialmente yama nan bon biní bèk na e waf. Kual tambe ta algu historiko, mirando ku ta promé bia ku e barkunan di fruta i berdura akí ta risibí un pèrmit di ‘standplaats’.
For di e momentu ku a bira konosí na yanüari 2018 ku e barkunan lo no a bini mas, Gobièrnu di Kòrsou a bini ku diferente inisiativa pa mantené e área di Sha Capriles bibu. Entre e inisiativanan akí, MEO a re-inisiá e proyekto pa laga empresarionan lokal hasi uso di e tonbanknan pa por a bende entre otro kosnan di boka dushi, bèrdura i fruta plantá lokalmente i artesania lokal. Ku reapertura di e frontera entre Kòrsou i Venezuela, Sha Caprileskade awor lo bira un kombinashon di empresarionan lokal huntu ku e barkunan venezolano. Dies (10) di e tonbanknan na Sha Caprileskade ta reservá pa akomodá 5 di e barkunan Venezolano i e sobrá 20 tonbanknan ta keda disponibel pa e empresarionan lokal. Manera ya ta e kaso for di aña 2018, Fundashon Marshe ta keda fungi komo atministradó (beheerder) di sitionan di ‘standplaats’ den sentro di siudat, inkluso e área di Sha Caprileskade pa asina sigurá kontinuidat i mantenshon.
Tantu Minister Cijntje komo MEO ta sumamente kontentu ku e desaroyo akí i ta enkurashá Pueblo di Kòrsou kompletu pa sigui sostené tantu nos propio empresarionan ku ta hasi uso di e área akí pero tambe awor e barkunan Venezolano ku ta bèk na Kòrsou.
