Kralendijk – Direktorado Komunidat i Kuido ta kuminsá e luna akí ku un prueba pa
coach siudadanonan surdu di 18 aña i mas grandi. E prueba ta tambe pa personanan
riba 18 aña ku un limitashon intelektual leve. Ta bai pa adultonan ku kompará ku
hendenan di nan edat, ta pensa na un nivel mas abou. Òf tin problema ku kosnan ku
pa hendenan di nan edat ta normal. Hopi biaha ta difísil pa nan komuniká ku otro
hende, no por mira na nan ku nan tin un limitashon.
Ta ofresé e coaching tambe na un grupo di kliente di Fundashon Akseso. E klientenan
akí den bida diario tin problema pa partisipá den komunidat. Intenshon ta ku tur
partisipante na e coaching, ku e guia i atenshon korekto, ta siña yuda nan kurpa mihó
den komunidat. For di investigashon na Boneiru a resultá ku e siudadanonan akí tin
problema pa por ehèmpel haña un trabou adekuá pagá. Òf pa haña un kas.
Den e prueba tin lugá pa mas o ménos 40 partisipante. Un parti di nan a yega di sigui
un kurso den pasado na Fundashon Forma. Un otro parti di e partisipantenan ta
konsistí di klientenan di Akseso, òf klientenan di un intérprete di lenga di seña.
Durante e coaching ta traha ku kada partisipante pa mira ki yudansa e ke. Pues ta
ofresé e partisipantenan yudansa personalisá. Pa partisipantenan surdu tin un
intérprete di lenga di seña presente.
Entrenadónan spesialmente prepará ta coach e partisipantenan. E ofisina lokal LOF
BV ta responsabel pa coachmentu di partisipantenan i entrenamentu di e life
coachnan. Por lo pronto e prueba ta pa e periodo di sèptèmber te ku desèmber 2023.
Direktorado Komunidat i Kuido ta spera ku despues di evaluashon di e prueba, por
coach partisipantenan nobo.
Via e prueba ku life coaching, e direktorado ke haña un bista kiko e partisipantenan
mester riba e tereno di entre otro formashon, trabou, salú. Ku e informashon ei, e
direktorado por hasi proposishon i huntu ku otro organisashon, traha plan pa e
gruponan akí.
Bo konosé un persona surdu riba 18 aña òf un persona riba 18 aña ku un limitashon
intelektual leve? I bo ke duna e persona akí su nòmber pa den futuro haña coaching?
Manda e ora ei un app pa LOF BV na number 777 6979. Òf pasa durante ora di ofisina
na Direktorado Komunidat i Kuido, Kaya Neerlandia 40.
