Esaki ta e gritu di legria vosiverá pa e parlamentario Gilbert Doran, kende ta unu di e poko nan ku a para firme for di inisio tras di su desishon pa no aseptá COHO den su formulashon aktual.
Tabata den wikènt tras di lomba, ku a bira konosí ku nos Promé Minister, señor Gilmar Pisas a
manda un karta ofisial pa staatssecretaris van Huffelen, kaminda e ta inform’é ku no tin sosten
sufisiente den Parlamento di Kòrsou pa bai di akuerdo ku COHO i ku mester hasi sierto
kambionan den e formulashon di COHO, pa asina no tacha derechonan di nos konstitushon.
E problema mayor pa ku e inaseptashon di COHO segun Parlamentario Doran, ta ku COHO ta
mina outonomia di nos pais, poniendo e posibilidat den man di otronan pa por tuma desishonnan
importante pa nos. Nos a bringa añanan largu pa por tabata liber den pensamentu i akshon, pues
ta inakseptabel pa kita nos derechonan for di nos i duna otronan pa dirigí nos pais. Komo desendientenan di skabitut, ku a bringa asina tantu pa tabata liber un dia, awe nos no por
skohe pa kita sunú i kana bai kunuku ku man dilanti nos pechu pa duna outoridat pa mara nos
mannan bèk i esklavisá nos. P’esei e gritu fuerte kontra COHO a keda semper vosiverá pa e
parlamentario en kuestion.
Ta p’esei Kòrsou, laga nos lanta para i aploudí fuertemente nos Promé Minister pa su balentia i
kurashi, pero mas ku tur kos pa a skucha e bos di pueblo di Kòrsou i di su Parlamento! Awe mas
ku ayera, nos ta rekonosé bo amor pa bo patria i bo vishon komo un lider firme i desisdido ku bo
a demostrá di ta for di inisio di bo trayektoria. “Mi ta felis di mira realisashon di lokual ku for di e promé dia ami a para firme pé. COHO ta mina mi derechinan tambe, i mi no por aseptá esaki ni pa ami, ni pa mi yunan i muchu menos pa mi pueblo. Pabien Gilmar Pisas. Bo ta un hòmber grandi i desidido”, tabata ekspreshon di señor Gilbert Doran en kuanto e desishon tumá pa señor Pisas di no aseptá COHO den su
formulashon aktual.
