Djaweps 8 di yüni 2023, e promé grupo di kandidatonan feminino a terminá e trayekto di Formashon Sosial (SVT). Di e 11 kursistanan femenino ku a partisipá na formashon sosial di e proyekto ‘Un Komienso Nobo’ na Marinekazerne Suffisant, un total di 9 kursista femenino lo risibí nan barèt. Dia 27 di febrüari, bou di guia di Ministerio di Defensa Hulandes, e grupo di hobensita akí a kuminsá ku e promé fase (SVT) di e kurso. Durante di un periodo di kuater luna nan a siña norma i valor, i tambe nan a traha riba nan formashon personal i kualidatnan manera disiplina, rèspèt propio, struktura, resilensia, konfiansa i sentido di responsabilidat. Tur esaki a sosodé den un forma militar.
Siguiente fase
E grupo di kandidatonan femenino lo pasa pa e siguiente fase di e proyekto, kual ta e “Leerwerktraject” (LWT), i esaki lo ta bou di guia di e organisashon di ehekushon Funditut. Durante di e fase akí e kursistanan lo haña guia pa asina siña un fishi ku ta pas ku nan kapasidatnan i alabes prepará nan mes pa subi merkado laboral. Ku e dos fasenan akí Gobièrnu di Kòrsou huntu ku ministerio di Defensa Hulandes ta brinda perspektiva pa futuro di nos hóbennan.
Inisio di koperashon
E proyekto akí ta ser ehekutá den kuadro di palabrashonnan entre Kòrsou i Hulanda pa loke ta trata e reformanan den e asina yamá ‘Landspakket’. E reforma akí ta inkluí bou di e tema ‘H18’ i ta wòrdu konsiderá komo ‘Sociaal Vormingstraject’, pues Trayekto di Formashon Sosial. Ministerio di Hustisia, Ministerio di Desaroyo Sosial, Labor i Bienestar, Ministerio di Enseñansa, Siensia, Kultura i Deporte i Defensa Hulandes, tur ta partnernan den e proyekto akí. E koperashon akí ta ofresé e posibilidat pa start ku un grupo di 35 hóben, dos bia pa aña. Den pasado e kurso akí tabata spesialmente pa kandidatonan maskulino. Pues ta algu ekstraordinario pa por anunsiá ku awor kandidatonan femenino tambe por forma parti di e proyekto akí di formashon sosial.
