Recientemente, Minister di Cultura, Xiomara Maduro, a continua su serie di bishitanan cu focus special riba motivacion y desaroyo personal di nos muchanan. Durante su bishita na St. Rosa College, Minister Maduro a tene un charla motivacional cortico, pero poderoso, cu e alumnonan di klas 6, enfocando riba e importancia di kere den nan mes y e impacto cu esaki por tin riba nan futuro. Minister Maduro a comparti su mensahe inspirador cu e muchanan, bisando cu ‘Kere den bo mes ta e prome paso pa logra cosnan grandi. Tur loke nos ta pensa y soña, nos por realisa si nos tin e confiansa y determinacion pa traha duro pa esaki.’ E mandatario a usa e ehempel di Betico Croes, un figura respeta y admira den nos historia, como un ehempel di loke un hende por logra ora cu e ta kere den su mes y su proposito.

E charla entre e Minister y e alumnonan tabata interactivo y dinamico. E mandatario a enfatisa e importancia di educacion, determinacion y persigui nan aspiracionnan, sin importa e desafionan cu nan por enfrenta. E mensahe di e Minister tabata enfoca riba anima e alumnonan pa sigui lucha pa nan soñonan y no laga nada ni ningun hende desanimanan. E reaccion di e alumnonan na e mensahe motivacional tabata positivo. Nan a demostra un gran interes pa cu esaki. Minister Maduro a termina su bishita cu un mensahe di danki na e directora y maestronan di St. Rosa College pa nan dedicacion y
apoyo continuo na e desaroyo di e alumnonan. E ta spera cu pa den futuro sigui haci mas bishitanan similar na otro scolnan, motivando y inspirando e proximo generacion di lidernan di nos Pais.

error

Enjoy this blog? Please spread the word :)

WordPress Cookie Plugin by Real Cookie Banner