Siman pasa a keda aproba den Conseho di Minister e peticion di Minister Geoffrey Wever pa conduci un estudio pa transiciona autonan di sector publico pa autonan electrico.

Den cuadro di Desaroyo Sostenibel y crecemento economico duradero ta importante pa reduci emision di CO2. E transicion pa energia limpi y sostenibel lo mester tuma lugar mas pronto cu ta posibel pa asina por mitiga e efectonan negativo riba nos clima y naturalesa door di e emision di CO2 cu ta bin di e uzo di productonan petrolero. Cu introduccion di autonan electrico den e sector di transporte ta crea e posibilidad pa reduci dependencia riba importacion di gasolin y diesel, y reduci e efectonan negativo di e volatilidad di prijs riba mercado internacional.

Den e trayecto di transicion pa energia sostenibel y limpi gobierno di Aruba kier ta e motor di cambio y un ehempel pa henter Aruba. P’esey Minister Wever a bin cu e proposicion pa cambia e autonan di nos aparato gubernamental pa autonan electrico, cu e vision pa aki 5 aña tur e dienstauto’s lo ta electrico.

Minister Wever kier acelera e proceso pa un sector di transporte y energia mas limpi. E estudio aki ta forma parti di e vision di maneho di Minister Wever. Tambe e estudio ta alinia cu e ‘Nota Energiebeleid 2020’ cu tin como target alcansa un minimo di 15% di autonan electrico pa Aruba pa 2030 y reduci e emision di CO2 cu e sector di transporte ta aporta na dje.

Minister Wever ta propone pa inventarisa tur e leasecontractnan vigente y pa asina cu esakinan vence cambia e autonan existente pa autonan electrico. Pa haci e transicion aki un exito tambe lo mester bin suficiente puntonan di recarga na e edificionan di gobierno pero tambe rond di Aruba.

Conhuntamente cu e departamentonan concerni, bou di guia di Minister Geoffrey Wever, lo determina abase di e resultado di e estudio con ta e manera mas responsabel pa ehecuta e plan menciona. Den e cuadro financiero lo mester aloca e capital necesario y e infrastructura adecua. Unabes cu e resultado di estudio ta conoci lo comunica esaki.

error

Enjoy this blog? Please spread the word :)

WordPress Cookie Plugin by Real Cookie Banner