Di 12 pa 18 di yüni Alexandra van Huffelen, Sekretario di Estado diRelashonnan den Reino i Digitalisashon, i minister di Bibienda Sosial i Planifikashon di Teritorio, Hugo de Jonge, ta hasi un bishita na Saba, Sint Eustatius i Boneiru. Kada un di e mandatarionan tin su propio programa, pero
na algun kombersashon i bishita tur dos lo ta presente. Den e akuerdo di koalishon tin inkluí ku den e siguiente periodo di gobernashon strukturalmente lo pone mas sèn disponibel pa Hulanda
Karibense; 30 mion euro pa aña entrante 2023. Tambe ministerionan lo bai traha ku mas énfasis riba nan responsabilidat na Hulanda Karibense. Den e kuadro aki resientemente entre otro minister Carola Schouten di Maneho di Pobresa, minister Dennis Wiersma di Enseñansa a bishitá e islanan.
Durante su bishita Sekretario di Estado Van Huffelen prinsipalmente ta papia ku personanan ku ta traha pa mehorá bida na Hulanda Karibense. “Komo gabinete nos a enfatisá ku nos ke duna mas atenshon na Hulanda Karibense. Spesialmente den e tempunan difísil aki, ta èkstra importante pa tende di personanan kiko nan tin mas nesesidat di dje.” Pa minister Hugo de Jonge e bishita ta den kuadro di sera konosí ku vários persona ku lo pon’é na altura di e problemanan riba tereno di bibienda i planifikashon di teritorio. Banda di esei e ta hiba kombersashon tokante un pakete di medida pa realisá un mihó standart di biba na Boneiru, Saba i Sint Eustatius.
Saba
Na Saba entre otro tin kombersashon planiá ku Konseho Insular, tin atenshon pa atendé plèstik riba kaya i pa mantenshon di herensia kultural riba e isla.
Sint Eustatius
Tópikonan ku ta atendé na Sint Eustatius ta rekuperashon di demokrasia, konservashon di energia i mantenshon di e herensia kultural. Tambe e Sekretario di Estado i minister huntu ta organisá un ‘town-hall meeting’ riba djamars, 14 di yüni, kaminda tur hende por papia ku nan.
Boneiru
Durante e bishita na Boneiru entre otro lo papia tokante historia di sklabitut, kuido pa naturalesa, kontakto ku hóbennan i oportunidat pa empresario.
Aruba
E Sekretario di Estado ta sigui biaha pa Aruba. Aya lo tuma lugá un konsulta riba djaluna, 20 di yüni, ku e promé ministernan di Aruba, Kòrsou i Sint Maarten tokante entre otro e Organisashon di Trabou Temporal (Tijdelijke Werkorganisatie, TWO).
