Gobièrnu di Kòrsou ta lamentá esaki i ta di opinion ku e degradashon no ta ilustrá e tantisimo esfuersonan ku gobièrnu a bin ta hasi pa kombatí trafikashon di personanan. Ehèmpelnan di esaki ta inkluí varios seshon di entrenamentu, reunionnan i kampañanan di konsientisashon ku a bin ta tuma lugá e ultimo añanan pa kombatí trafikashon humano.
Gobièrnu ke suprayá tambe diferente proseduranan legal andando kual ta demostrá e esfuerso inkansabel pa kombatí e fenomeno ya menshoná.
Gobièrnu tin atenshon pa e severidat di trafikashon humano i ta komprometé su mes pa kombatí esaki. No opstante esaki algun di e rekomendashonnan hasí den e rapòrt ta bai en kontra di nos estado di derechi manera por ehèmpel nos trias politika. Echo ta ku gobièrnu ta konfrontando k’un situashon finansiero no muchu alentador i e situashon geopolítiko di Venezuala kual ta hasi e fluho di indokumentadonan aún mas grandi. Organisashonnan kriminal naturalmente ta hasi uso di e situashon prekario aki pa trafiká personanan.
Gobièrnu di Kòrsou lo bai sigui desaroyá maneho i planesnan pa sigui kombatí trafikshon di hende i ta konvensí ku a korto plaso gobièrnu Merikano lo subi nos klasifikashon riba e lista di TIP.
