Den próksimo aña eskolar 2023-2024 MBO Bonaire ta agregá dos estudio nobo na su oferta di estudio: ‘Tékniko básiko di vehíkulo i mashin móbil’ (nivel 2) i ‘Tékniko allround di vehíkulo i mashin móbil’ (nivel 3). Ta desaroyá e estudionan den kooperashon estrecho ku Summa College na Hulanda. E siman akí Roel Akkerman, direktor di enseñansa i dosente John van de Ven, a bishitá Boneiru pa huntu ku e tim di enseñansa di Scholengemeenschap Bonaire diseñá un bunita estudio, ku ta pas ku deseonan di e isla.

A bishitá diferente empresa den e sektor di mobilidat na Bonaire, bou di nan Cicilia Motors, Garage Cordia, Napa Autoparts, Autocity, Scooters Bonaire, Fundashon Mariadal i Center Body Car Polo, den presensia di ROA CN, direktor Elyane Nicolaas i konsehero Fernon Estanista. A papia ku e empresanan tokante posibilidat di stazje i deseo di formashon den e sektor.

Despues e tim, huntu ku e dosentenan i e lider di tim di MBO Bonaire, a bai tradusí e deseonan den un programa edukativo i desafiante a base di posibilidatnan lokal. Den e formashon lo pone atenshon tambe na e desaroyonan riba tereno di vehíkulo eléktriko, vehíkulo di dos wil, mashin móbil i sektor marítimo.

Roel Akkerman: “Pa medio di e hopi kòmbersashonnan, nos a haña un bon bista di deseonan di e empresanan i mirando desaroyo di e parke di vehíkulo na Boneiru, komienso di e estudio nobo di téknika di outo ta nèt na tempu!”

Liset de Keijzer, direktor interino di unidat di MBO Bonaire, ta agregá ku e ta sumamente kontentu ku e mihó skol pa téknika di outo na Hulanda awor ke fungi komo partner di MBO Bonaire. “Nan konosementu i eksperensia ta grandi i ta yuda nos enormemente na komienso di e estudio nobo akí!

error

Enjoy this blog? Please spread the word :)

WordPress Cookie Plugin by Real Cookie Banner