Fundashon Mariadal, pa hopi aña kaba un proveedor konfiabel di kuido di air ambulance na Boneiru, ta kontentu di por pone e siguiente paso den desaroyo di kontinuidat di kuido médiko di air ambulance i garantisá esaki pa futuro, na interes di e pashèntnan na nos isla. Entrante 24 di yanüari 2024, pa un siguiente fase di ehekushon profeshonal di buelo di ambulans, FM ta drenta un kolaborashon ku SARPA, un paso ku aun mas ta suprayá nos dedikashon na kuido ekselente di pashènt.

Komo proveedor di air ambulance konfiabel na nos isla, semper Fundashon Mariadal a komprometé su mes pa transportá pashèntnan na un manera efisiente i médikamente responsabel pa fasilidatnan médiko spesialisá den region. E kolaborashon nobo ku SARPA, un organisashon ku un reputashon ekselente riba tereno di transporte di pashènt ku avion, ta hasi posibel pa FM mehorá su dunamentu di kuido mas tantu ainda. E kolaborashon ta enserá un integrashon harmonioso di FM su ekspertisio médiko ku e eksperensia amplio ku SARPA ta disponé di dje den e forma di transporte aéreo spesífiko akí. Pa e pashènt esaki ta garantisá un transishon sin ningun problema pa un konfiabilidat mas haltu di e servisio di air ambulance ku ta disponibel. Naturalmente den e situashon nobo akí tambe Fundashon Mariadal ta keda responsabel pa e kuido médiko, miéntras ku SARPA lo ehekutá e buelonan ku nan avionnan spesialisá.

Un añadishon signifikativo na e servisio eksistente ta e kapasidat pa na mes momentu transportá dos pashènt ku ta rekerí kuido intensivo riba ‘stretcher’ di air ambulance ku e avionnan di SARPA ku ta spesialmente ekipá pa esaki. E mehorashon akí ta oumentá FM su posibilidatnan pa proveé kuido ku ta salba bida di hende den situashonnan di emergensia, por ehèmpel den kaso di kalamidat. E servisio di air ambulance ku Fundashon Mariadal ta ofresé, ta un añadishon krusial na su kuido (intensivo) ekstenso. For di momentu di lanta buelo te na e aterisahe, FM ta sòru pa un kalidat haltu i sin interupshon di vigilansia i kuido pa pashènt.

Fundashon Mariadal ta sigui hasi esfuerso pa salú i bienestar di nos komunidat na Boneiru i den region. E kolaborashon ku SARPA ta un paso padilanti ku ta bon biní den FM su mishon pa skapa bida di hende i duna e standart di kuido di mas haltu na su pashèntnan i nan famia.

error

Enjoy this blog? Please spread the word :)

WordPress Cookie Plugin by Real Cookie Banner