Fundashon Cas Boneriano (FCB) i Kuido i Hubentut Hulanda Karibense (ZJCN) ta traha huntu na bibienda struktural pa hóben di 16 pa 24 aña por biba bou di guia. Realisashon di un ambiente sigur i adekuá ku lo ofresé lugá na 12 hóben a kuminsá algun siman pasá.
For di mart 2021 a kuminsá ku e pilot Biba bou di Guia. Den e bibienda na Boneiru aki ta guia hóben entre 16 pa 24 aña di Hulanda Karibense den direkshon di mas independensia. E hóbennan aki a kana un trayekto largu di yudansa na Jeugdzorg. Apesar di e yudansa e situashon di kas a keda meskos. Via e trayekto di Biba bou di Guia e hóbennan aki ta siña oumentá outo-sufisiensia i biba nan bida na un forma independiente.
Ku un evaluashon positivo di Inspekshon di Salubridat i Hubentut (IGJ) – despues di 2 aña – awor a será e fase di pilot di forma eksitoso i ta bai desaroyá e fasilidat di Biba bou di Guia. E aña aki ta bai enfoká riba mas desaroyo profeshonal i e konstrukshon di un propio lokalidat nobo.
Despues di un destaho FCB a selektá BonNed komo kontratista pa e proyekto aki. Despues di mehorashon di suela BonNed a kuminsá ku e fundeshi pa e edifisio di Biba bou di Guia. E fasilidat tin kamber ku baño kompartí i un sala i kushina komun. Tambe tin studio i apartamento ku un propio kushina i baño. Asina e hóbennan ta haña e posibilidat pa den fase i bou di asistensia siña biba di forma independiente; un propio hogar den un kas komun.
Den e diseño a tene kuenta ku e posibilidat pa eventual ampliashon den futuro. E espektativa ta ku lo finalisá e edifisio den di 4 kuartal di e aña aki i ku por hasi entrega di e proyekto.
