Ta bai adaptá e leinan ku ta regula e relashon administrativo i finansiero entre Hulanda i Boneiru, Sint Eustatius i Saba. For di djaluna 4 te ku djarason 6 di mart, lo tin un konferensha di trabou di tres dia riba e amienda di e Lei Entidatnan Públiko BES i e Lei Finansiamentu di Entidatnan Públiko BES (WolBES i FinBES). E konferensha di trabou ta un paso adishonal den e proseso di konsulta i ta terminá e periodo di konsulta. Miembronan di e konsehonan insular i kolegionan ehekutivo di Boneiru, Sint Eustatius i Saba, lo
partisipá na e konferensha huntu ku Sekretario di Estado Alexandra van Huffelen di Relashon di Reino i Digitalisashon

Terminashon di e proseso di konsulta
E modifikashon di e leinan WolBes i FinBES ta nesesario pa mehorá e relashonnan administrativo i finansiero entre e entidatnan públiko i Hulanda Oropeo. E meta di e konferensha ta pa konkluí e konsulta riba e lei. E konferensha ta un paso adishonal den e konsulta. E ta organisá a petishon di e islanan i e agenda a keda trahá konhuntamente. Durante e konferensha, lo trata diferente punto substanshal di e lei.
Ademas, lo trata algún otro tópiko ku no ta kai bou di e ley. E métodonan di trabou i e relashon di koperashon mutuo entre gobièrnu sentral i Boneiru, Sint Eustatius i Saba, tambe ta riba agènda di e konferensha.

Invertí den konfiansa
WolBES i FinBES a drenta na vigor na 2010. Den WolBES tin pará kon entidatnan públiko ta organisá. FinBES ta stipulá relashonnan i supervishon finansiero. E leinan ta kambia despues di un rekomendashon for di 2019 di e Konseho di Estado Hulandes. E kambionan di e lei ta basá riba e prinsipio di konfiansa mutuo. Den e último añanan, a atkiri hopi konosementu i eksperensha riba kon e leinan aki ta funshoná den práktika. Tin mas informashon tokante kiko ta bai bon i unda tin margen pa mehorashon. E kambionan legislativo proponí lo inverti ainda mas den konfiansa mutuo i mas autonomia lokal.

Kambionan principal den WolBES i FinBES
Pa por aumenta autonomia lokal, lo introdusí diferente forma di supervishon di finansa i presupuesto. Si e entidat públiko no ta maneha presupuesto òf finansa manera mester ta, e supervishon finansiero ta bira mas fuerte. Si un entidat públiko ta funshoná bon, tin un supervishon leve. Pa fortalesé demokrasia lokal, lo oumentá e kantidat di konsehero i diputado insular i nan lo risibí mas sosten. Ademas, ta elaminá e funshon di Representante di Reino. Algun di e tareanan ta bai pa e gezaghèber. Tambe ta trata di simplifiká i fleksibilisá e supervishon administrativo di ehekushon di tareanan insular. E kambio den lei ta kontribuí na un mihó funshonamentu i gobernashon mas efektivo, i ménos burokrasia. Tur esaki ta den
interes di e habitantenan di e tres islanan.


Tokante e kambionan di e lei proponí tabatin diferente interkambio ku entidatnan públiko Boneiru, Sint Eustatius i Saba. Ademas, a pidi konseho di diferente interesado (‘stakeholder’), manera Rijksdienst Carbisch Nederland, e Representante interino di Reino, Kolegionan di Supervishon Finansiero di Boneiru, Sint Eustatius i Saba i diferente ministerio. Tambe habitantenan di tur isla por a duna nan opinion
riba e kambionan proponí den e lei durante di un konsulta riba internèt.

error

Enjoy this blog? Please spread the word :)

WordPress Cookie Plugin by Real Cookie Banner