Kralendijk – E bishita di trabou na fin di luna di mei di e Minister pa Protekshon Hurídiko sr Franc Weerwind na Boneiru, despues di a sera konosí ku gezaghèber interino Nolly Oleana, a ranka sali ku un kòmbersashon konstruktivo ku Kolegio Ehekutivo. E liña prinsipal den e kòmbersashon akí tabata posibel medidanan i solushonnan pa un mihó akseso na derecho hurídiko, prevenshon di kriminalidat hubenil i BIBOB Hulanda Karibense.

Akseso na derecho hurídiko ta pidi pa un fasilidat di promé liña den forma di un lokèt hurídiko. E lokèt hurídiko ta sòru pa hendenan haña informashon na un manera fásil alkansabel tokante nan derechonan i obligashonnan, pero e ta un sitio tambe kaminda hendenan por akudí ku nan preguntanan, di manera ku nan no tin mester di aserká un abogado mesora. A base di un proyekto di prueba na Saba a akumulá informashon pa un senario básiko. Den e senario básiko akí nan a formulá den liñanan grandi kon e lokèt mester lusi, kua ta e funshonalidatnan ku e mester tin, i pa kua grupo di enfoke e ta intenshoná. A tene kuenta tambe ku e nesesidatnan i konteksto di nos islanan i kua ta e ròl ku e lokèt hurídiko for di Hulanda por hunga den esaki. E siguiente paso, ku a deliberá tambe tokante di dje ku e minister, ta e elaborashon práktiko di e dunamentu di ayudo hurídiko di promé liña na Hulanda Karibense.

Banda di legislashon i regulashon, protekshon hurídiko tambe ta un tópiko pa instansianan ku tin relashon ku derecho hurídiko, manera konseho di tutela (voogdijraad), Instituto Hudisial Hulanda Karibense (JICN) i rehabilitashon sosial (reclassering). E minister a bishitá e instansianan akí i tambe e proyekto di prevenshon “Abo só ta disidí” di Jong Bonaire. E konosementu ku e minister a optené na Boneiru, e ta bai kompartí ku Ministerio di Hustisia pa di e manera akí determiná pasonan di kontinuashon i traha riba e solushonnan deseá ku a keda palabrá pa Boneiru.

error

Enjoy this blog? Please spread the word :)

WordPress Cookie Plugin by Real Cookie Banner