Awe trabounan a kuminsá pa instalá un faha pa transportá ekipahe mas grandi den e sala di yegada di Aeropuerto Flamingo. Tambe lo ekspandé e sala di yegada den dos fase. E faha pa rekohé ekipahe nobo ta mas grandi i pa e motibu ei ta ofresé mas espasio na biaheronan pa kita nan maleta fásil for di riba e faha. Tambe e ta duna e despachadónan mas espasio pa pone mas ekipahe na mes momentu riba e faha. Debí na e kapasidat èkstra akí, e espektativa ta ku e fluho den e proseso di reklamashon lo mehorá, di manera ku e manera ku pasaheronan ta eksperensiá esaki tambe lo bai mehorá mas.
Pa motibu ku ta organisá e sala di yegada mas efisiente, e parti di salida ta bira mas amplio, di manera
ku ta krea mas espasio di espera pa e pasaheronan. Mas despues, despues ku finalisá diferente otro
renobashon, lo sigui amplia e sala mas. Durante e trabounan pa demontá e faha bieu i instalá e faha nobo, durante un periodo di 3 te 4 siman lo ni tin faha di ekipahe disponibel pa pasaheronan yegando. Ta kombertí un gran parti di e sala di yegada den un área di konstrukshon restringí. Pa tòg por duna pasaheronan yegando mas mihó servisio posibel, lo traha un sala di yegada temporal na e parti dilanti di aeropuerto, y lo yuda manual ku e proseso di reklamashon di ekipahe. Lo informá biahero- i usuarionan di aeropuerto a traves di di diferente kanal i ta pidi diskulpa pa e inkombeniensia temporal debí na e trabounan di konstrukshon.
Edelson Clemencia, ko-lider di proyekto di BIA: “Nos ta trata di ehekutá e trabounan mas rápido posibel, pa tene e molèster mas limitá posibel. Na final tur pasahero lo eksperensiá mas komodidat debí na e sala mas grandi i e faha pa transportá ekipahe nobo.”
