Durante e konferensia di trabou aki lo pone un siguiente paso riba e kaminda pa un maneho di pobresa efektivo pa Boneiru, basá riba nesesidatnan real, un vishon kompartí, i un
aserkamentu integral. Antisipando riba determinashon di e mínimo sosial, durante e konferensia di trabou lo trata e enkargonan lokal riba tereno di siguridat di eksistensia, oportunidat igual, partisipashon, i kapasidat pa por yuda bo mes. Ku feedback di tur profeshonal envolví den e problemátika di pobresa lokal na Boneiru, e organisadónan ta spera di yega na konklushonnan tokante kiko ta e enkargonan di mas importante, i kon por traha huntu efektivamente riba esakinan. Tambe lo tin presentashon di oradornan ku hopi eksperensia riba tereno di kombate di pobresa lokal. E enfoke di e organisadónan ta pa na final di e konferensia di trabou diputado Jolinda Duncan-Craane na nòmber di Kolegio Ehekutivo, i minister Carola Schouten (Pobresa, Partisipashon i Penshun) na nòmber di Reino, firma un deklarashon final tokante e kontribushon ku Entidat Públiko Boneiru i Reino ta duna na e programa di pobresa lokal.
Mapa di Ruta
E konferensia di trabou ta forma parti di e mapa di ruta ‘Huntu kombatí pobresa’ ku Entidat Públiko Boneiru a desaroyá na fin di 2022. E meta ta pa yega na un aserkamentu integral pa prevení, kombatí, i aliviá pobresa, di moda ku ta mehorá siguridat di eksistensia di hende ku entrada abou, oumentá oportunidat igual i kapasidat pa yuda bo mes, i ku tur hende por partisipá den sosiedat. Durante un promé simposio tokante e problemátika di pobresa na novèmber 2022, e konklushon tabata ku pobresa ta enserá un reto kompliká. Kolaborashon den prevení, kombatí i aliviá pobresa ta un nesesidat, unda e habitante di e isla ta sentral. Den e lunanan ku ta tras di lomba, gruponan di enfoke a tuma lugá ku habitante vulnerabel, hende ku trabou, i profeshonal ehekutivo, i a hasi un inventarisashon amplio di kua
fasilidatnan falta ainda. Lo kompartí resultadonan di e inventarisashon amplio aki durante e konferensia di trabou riba 25 i 26 di mei, i lo determiná e siguiente pasonan.
