E siman aki dia 25 di januari 2024 nos ta celebra Dia di Betico na ocasion di e fecha natalicio di Aruba su Libertador, gran estadista, politico, maestro y lider stima pa su Pueblo, sr. Gilberto Françios ‘Betico’ Croes. Manera custumber riba e fecha aki lo tin diferente actividad rond di Aruba, sinembargo Minister Maduro kier haci un invitacion special pa Pueblo acudi dia 24 y 25 di januari na Plaza Libertador G.F. Betico Croes pa rindi homenahe na e lider inmortal y stima di nos Pais.

Manifestacion Cultural
E invitacion ta pa dia 24 di januari nos topa riba Plaza Betico na unda lo tuma luga e Manifestacion Cultural cu lo cuminsa pa 6 or di atardi cu presentacion di Caha di Orgel, feria culinario, boca dushi y artesania. Pa 8 or di anochi e programa oficial cu Himno di Aruba, sigui pa discurso di Minister Maduro di Cultura. E programa lo sigui cu show di canto, baile, musica. E presentacion di e hobennan di Tipico Colegio Arubano y despues un concierto presenta pa un orkesta, bao encargo di e maestro
Dwight Leonetta, cu lo acompaña varios di nos artistanan local cu o interpreta cancionnan dedica na Betico Croes.

Acto Protocolar
Dia 25 di januari riba Dia di Betico, Pueblo ta keda invita pa e Acto Protocolar riba Plaza Betico na unda cu Minister President Wever-Croes lo hiba un discurso. E mainta aki ta cuminsa 9or cu canto, poesia y baile di nos muchanan dedica na e lider stima Betico Croes. Ademas lo tin e acto di ofrenda floral na estatua di nos Libertador.

Betico, e lider stima pa su Pueblo
Betico a stima Aruba y a dedica gran parti di su bida ta lucha na bienestar di e Pueblo di Aruba. E amor grandi aki ta locual awe ainda ta tene nos uni como un Pueblo y Pais. Ban duna Betico su honor mereci contando nos yuinan y nos bishitantenan di e legado cu Betico por medio di su amor grandi pa Aruba, a laga pa nos.

error

Enjoy this blog? Please spread the word :)

WordPress Cookie Plugin by Real Cookie Banner