48 Hour Film Project Curaçao ta wòrdu organisá pa e di 7 biaha na Kòrsou. E kompetensia di
pelikula kòrtiku ta habrí pa tur hende, sea hòbista òf profeshonal den traha pelikula. E ganadó
ta haña e oportunidat pa partisipá na e festival internashonal ku lo tuma luga na 2024 na
Lissabon. E kompetensia emoshonante lo tuma luga den wikènt di 20 pa 22 di òktober.
Konsepto di 48 Hour Film Project
E kompetensia a wòrdu organisá pa promé biaha na 2001 na Washington, Merka. E idea ta ku
un tim mester wòrdu formá i ta inskribí nan mes pa e kompetensia. Durante di e kompetensia
nan ta haña e tarea pa skirbi, graba, i monta un pelikula kòrtiku durante 48 ora. E pelikula
produsí no por ta mas kòrtiku ku 5 minüt i no por ta mas largu ku 7 minüt. Na komienso di e
kompetensia, kada tim ta risibí un par di tarea, manera un rekisito, un personahe i un frase ku
mester wòrdu usa den e pelikula. Ademas di esaki, kada tim ta risibí un “genre” spesífiko ku nan
mester tene kuenta kune. Despues ku tur tim simultaneamente a risibí nan tarea riba djabièrnè
dia 20 di òktober, 7’or di anochi, tur tim ta kuminsá e reto pa entregá un produkshon den
menos ku 48 ora.
Premio
Djaweps, dia 26 di òktober, tur e pelikulanan kòrtikunan ku a wòrdu filmá durante dje 48 Hour
Film Project Curaçao, lo wòrdu estrená na The Movies Otrobanda. Despues di e estreno, lo tin
un “Award Show” kaminda lo premia e pelikulanan den varios kategoria, manera “Best Film” i
Publiko su Favorito. Lo sigi mustra e pelikulanan di 48 Hour Film Project Curaçao un siman largu
na The Movies Punda. Tanto e “Award Show” i otro dianan ku lo mustra e pelikulanan kòrtiku
ta habri pa publiko. Por kumpra karchi via e wèpsait di The Movies Curaçao.
Filmapalooza na Lisboa mart 2024
E ganadó den e kategoria di “Best Film” di 48 Hour Film Project Curaçao lo wòrdu presentá
durante Filmapalooza Film Festival ku ta tuma luga na mart 2024 na e kapital di Portugal,
Lisboa. E pelikula ganadó di 48 Hour Film Project Curaçao lo enfrentá otro pelikulanan ganadó
for di mas ku 200 siudat rònt mundu. Durante di Filmapalooza, partisipantenan di rònt mundu
ta haña un chens di konosé otro anto atendé “workshop” riba diferente topikonan di film.
Danki na spònsernan lokal, representante di tim dje pelikula ganadó di 48 Hour Film Project
Curaçao lo haña e oportunidat pa bai Filmapalooza Film Festival na Lisboa. Ganadónan anterior
di 48 Hour Film Project Curaçao a deskribí nan eksperiensia ku Filmapalooza internashonal
komo ‘un eksperiensia inolvidabel’
Organisashon
E aña aki, Sra. Melissa Verboeket di Maction Caribbean i Sr. Bert Aengenendt ta responsabel p’e
organisashon di 48 Hour Film Project Curaçao. Den añanan anterior, Sr. Ramses Petronia a
organisá e proyekto ku hopi eksito, pero e aña aki e la disidí pa enfoká riba otro proyektonan
andando. Pa Sra. Verboeket, esaki lo ta su di dos biaha den e organisashon di 48 Hour Film
Project Curaçao, i e ta mira e kompetensia aki komo ‘un plataforma internashonal úniko
kaminda nos por mustra kuantu talento ekstraordinario tin riba nos isla’. Sr. Aengenendt, su
kolega organisador, ta enfatisá; ‘komo un eks-partisipante mi a siña apresiá 48 Hour Film
Project komo un eksperensia úniko ku lo keda ku bo pa restu di bo bida.’ Tantu Verboeket komo
Aengenendt ta enfatisá ku ‘no ta importá si ta ku “smartphone” òf un kamara bo ta traha bo
pelikula kòrtiku, tur kos ta permití basta ku bo kumpli ku e tareanan i entregá e produkshon
final den 48 ora. Lo kual ta konta ta ku bo tin un pashon pa traha pelikula i e abilidat pa konta
un bon kuenta.’
Partisipashon ainda ta posibel
Registrashon ta limitá, pero ahinda tin posibilidat di registrá. Pa mas informashon i
registrashon, por subi e wèpsait di 48 Hour Film Project Curaçao:
www.48hourfilm.com/curacao.
