Formulashon di un posishon komun tokante kambionan den WolBES i FinBES.

Stimulá diálogo tokante un kooperashon formal i establesé posishonnan konhunto riba áreanan di interes komun tabata e resultadonan prinsipal di e kumbre BES ku a tuma lugá siman pasá, for di 16 pa 18 di yanüari na St.Maarten. Miembronan di e Konseho Insular i Kolegio ehekutivo di Boneiru, Sint Eustatius i
Saba a asistí na e kumbre aki. E meta prinsipal di e kumbre di tres dia tabata pa sigui forma un aserkamentu kolektivo riba e retonan atministrativo i polítiko ku e islanan ta enfrentá, algun di nan komo resultado direkto di kambio konstitushonal. E seshonnan tabata presidí pa e miembro honorabel di Konseho Insular di Sint Eustatius, Sr. Glenville Schmidt. Sint Eustatius tin e presidensia di e inisiativa di kooperashon entre e islanan for di yüni 2023 i lo sigui kuné te yüni di e aña aki. E partisipantenan ta di akuerdo ku e kumbre a demostrá di ta un plataforma pa debatenan habrí i tambe un oportunidat pa krea konsenso entre institutonan polítiko di e islanan. E propósito di e kumbre tabata pa traha riba un mekanismo konhunto i permanente di kooperashon entre e islanan, i pa haña un bista detayá di prioridatnan di kada isla relashoná ku kambionan den WolBES i FinBES. E kambionan ku ta tumando lugá den e leinan ta fundamental, i ta importante pa e islanan identifiká nan preokupashon komun promé ku e legislashon keda presentá den “Tweede Kamer” pa aprobashon.

E tres islanan ta di akuerdo ku ta un momento históriko, for di nan mes boluntat nan a buska pa establesé nan mes kooperashon. Tambe nan ta rekonosé ku tin biaha yega na un konsenso por parse un tarea difísil. Sin embargo, kolektivamente nan ta keda konsiente ku ta trata di un esfuerso konhunto, i ta importante pa sigui sostené otro asta ora tin diferensia di opinion. E islanan a deklará ku nan a disidí di sigui traha huntu ku otro, ya ku esaki ta benefisiá tur habitante di e islanan. Lo establesé un grupo di trabou ku ta konsistí di un diputado i lidernan di frakshon di kada isla pa garantisá progreso riba diferente tópiko. Aktualmente Sint Eustatius ta karga e presidensia di e kooperashon, despues di yüni 2024, e presidensia lo pasa pa Saba. E siguiente kumbre lo tuma lugá na Den Haag, na mart 2024.

error

Enjoy this blog? Please spread the word :)

WordPress Cookie Plugin by Real Cookie Banner