E barku legendario di Greenpeace Arctic Sunrise lo mara na e Noordpier na Boneiru di 20 pa 27 di aprel próksimo. Tur hende ta bon biní pa bin haña un rekorido grátis durante e asina yamá open boot dagen, dianan ku e barku ta habrí pa bishita liber. Ademas ta bai tin diferente aktividat ku lo tuma lugá riba i rondó di e barku. Esakinan ta den kuadro di e kaso den korte ku Greenpeace huntu ku habitantenan di nos isla ta bai entamá kontra Estado Hulandes, pa protehá Boneiru kontra kambio di klima.
Resientemente Greenpeace a protestá tambe ku e Arctic Sunrise kontra minamentu den awanan profundo, pa motibu di e daño ku e tipo nobo di minamentu akí lo trese kuné pa e bida marino. E Arctic Sunrise i e Rainbow Warrior III ta e barkunan di mas grandi i mas konosí di e flota di Greenpeace International. E Arctic Sunrise ta yega Boneiru for di Kòrsou, kaminda a hasi trabou di mantenshon na e barku.
Dianan ku barku ta habrí pa bishita liber
“Nos ta masha kontentu ku e Arctic Sunrise ta bin nos bunita isla”, asina Meralney Bomba di Greenpeace na Boneiru ta bisa. “Asina nos por laga mas hende sera konosí ku Greenpeace i e kampañanan pa protekshon di laman, mondinan i klima, ku Greenpeace ta traha na dje rònt mundu. Nos ta spera di por risibí hopi hende na e rekoridonandurante e open boot dagen riba djasabra 22 di aprel i djaweps 27 di aprel.”
Antártika
Anteriormente e Arctic Sunrise tabata un barku pa kibra eis. P’esei e ta masha adekuá pa nabegá bai na e partinan di mas friu na mundu, pa midi i registrá e efektonan di kambio di klima mei mei di e áreanan polar vulnerabel akí. Asina sientífikonan na bordo a hasi investigashon tokante e konsekuensianan di kalentamentu di mundu riba e kolonianan di pingwin na Antártika.
E Arctic Sunrise ta forma parti di e flota di Greenpeace for di 1995. Su promé kampaña tabata riba Noordzee. Ei a hasi investigashon tokante e efektonan di plataformanan di bora (boorinstallaties) riba e bida den laman. Den e último tres dékadanan el a nabegá rònt mundu. Di Antártika te Amazonia, i awor Boneiru, pa pidi atenshon pa e partinan mas vulnerabel, pero tambe mas bunita na mundu.
Programa
Open boot dagen: djasabra 22 di aprel i djaweps 27 di aprel (na espera di konfirmashon)
un Rekorido ta disponibel pa tur hende, entre 10:00 pa 18:00 nòn-stòp.
Idiomanan: Papiamentu, Ingles, Hulandes
Karchi di entrada (grátis) lo ta optenibel na diferente sitio na Boneiru.
Reuní na e ‘Noordpier’.
Mas informashon ta disponibel online via https://act.gp/arctic-sunrise-bonaire
Djaweps anochi 27 di aprel e Arctic Sunrise ta lòs kabuya i bandoná Boneiru.
