Minister di Turismo y Salud Publico sr. Dangui Oduber ta informa comunidad cu e resultadonan di turismo pa luna di October 2023 a drenta. Pa luna di October 2023 e cifranan ta positivo y e reportahe ta demostra cu Aruba ta den e top 3 destinacionnan pa bishita den caribe.

Den luna di October Aruba a ricibi 93,857 turista via nos aeropuerto. Cu un crecemento di 12.4% den comparacion cu luna di October 2022. Locual a resalta den e reportahe ta e crecemento y cu e mercado mas grandi ta keda Norte America cu 81.6% y Sur America 10.1% y Europa cu 5.9%.

Turismo ta sigui crece y sigui surpasa nivelnan di aña 2019 cual sigur ta excepcional. Tambe ta pa nota cu motibo di bishita pa e luna di October 2023 en comparacion cu 2022 ta pa negoshi, conferencianan y e shopping na Aruba.

Tur indicador ta demostra cu e experiencia di e bishitante ta keda uno halto y ta wordo clasifica cu 9.3 den servicio y 9.5 cu e gastronomia cu ta wordo evalua door di e bishitantenan mes.

Otro indicacion sumamente importante ta cu Aruba Tourism Authority (ATA) ta traha cu e plataforma “transparent insight” cu ta midi e termino corto pa “vacation rentals” na e propiedadnan na Aruba y ta tambe evalua e “average daily rate” (ADR) pa midi e impacto cu esaki tin ariba nos economia. Ademas, loke ta “vacation rentals” den caribe, Aruba ta den e top 3 nan cu tin e (ADR) mas halto.

Vacation Rentals na Aruba di January pa October di 2023 ta $47.424,595 mas compara cu 2022. E scenario aki ta demostra cu tin crecemento y cu nos bishitantenan ta gastando mas cen den nos economia.

Linea crucero nan tambe ta demostra confiansa den Aruba cu un crecemento di 60.5% di January pa September di 2023 den comparacion cu 2022.

Minister Oduber ta gradici tur partner y tur cu ta laborando den e industria di turismo. Tur personan aki ta haci cu awe Aruba ta surpasando tur espectativa den su recuperacion. Danki na e pueblo cu a demostra di ta uno resiliente, ban sigui demostra nos cordialidad y duna e hospitalidad na nos bishitantenan cu nos ta conoci pe. Turismo ta keda e driver principal di nos economia.

error

Enjoy this blog? Please spread the word :)

WordPress Cookie Plugin by Real Cookie Banner