Ku tema ‘Rekordando yùfrou Joy’
Kralendijk – Sekshon di Kultura, Arte i Literatura (SKAL) i Komishon Di Luna Yen ta kontinuá
ku aktividatnan segun su kalènder kultural. Riba djabièrnè 29 di sèptèmber 2023 lo tin e
evento ‘Anochi Ku Luna Yen’ di 7or pa 9or di anochi na kunuku La toma na dam grandi,
Playa Grandi. Konosí tambe komo kunuku di defuntu yùfrou Joy. Tema di e anochi ta
‘Rekordando yùfrou Joy.’ Un anochi ku poesia ku luna yen. ‘Anochi ku Luna Yen’ ta un
evento sosial di pueblo i pa pueblo, pues un i tur ta kordialmente bonbiní.
Personanan di Playa ku mester di transporte, por hasi uso di un bùs ku ta sali for di SKAL
18:00 or pa bai Rincon. Ta pidi tur esnan ku ke hasi uso di e servisio di transporte pa hasi
reservashon na tempu na SKAL òf yama +599 715 5323. Di e forma akí nos por hiba un mihó
komunikashon ku otro.
Manera semper, ta keda liber na kada bishitante pa trese algu di boka dushi pa kompartí ku
otro bishitante, ta supliká tur hende pa bini ku nan propio stul. No neglishá bo kapasidat i bin
demostrá ku bo por. Nos ta apresiá i respetá tur obra, ku eksepshon di palabranan bulgar,
polítika, problemanan personal i tur loke ku no ta kuadra ku meta di e evento.
Anochi ku Luna Yen ta un inisiativa ku a nase den pasado for di algun siudadano ku gran
pashon pa nos idioma papiamentu. SKAL ta keda pone énfasis ku meta prinsipal di e evento
ta pa stimulá otro pa skirbi, deklamá, konta storia, kanta òf presentá obranan kòrtiku na
papiamentu.
Pa mas informashon por tuma kontakto ku kolaboradónan:
Magali Sumter; +599 9 565 0947
Ubaldo Anthony; +599 717 4935
Orlando Francisca; +599 786 2131 òf +599 7962131
SKAL; +599 717 3616
