Dia 15 di mei último e sindikato AFBW tabata na St Maarten pa asina partisipá den e negoshashon ku ta andando pa yega na un “CAO ZORG BES”. Tabata tin diferente dunadó di trabou den e sektor di kuido i e sindikatonan di Saba i St Eustatius i AFBW di Boneiru.
Dia 16 i 17 mei tabata dos dia ku representante nan di Fundashon Mariadal, Sint Eustatius Health Care Foundation, Sint Eustatius Auxiliary Home, Mental Health Caribbean i Saba Cares, ku e sindikatonan AFBW, All for 1 i SUPLUA, a traha huntu pa harmonisá nan enfokenan, un punto hopi importante ta; “trabou igual ta pago igual”. E reunion tabata na St. Maarten i lo sigui na luna di sèptèmber di aña aki na Kòrsou. Pa medio di e enfoke riba harmonisashon, a igualá e elementonan prinsipal di kondishonnan
laboral primario, uzando e skala di salario di Fundashon Mariadal i a hasi e salarionan igual pa e organisashonnan di kuido na Saba i Sint Eustatius.
AFBW i e otro organisashonnan ta kere ku “Huntu nos ta mas fuerte”. E reunion di partidonan di kuido ta un kontinuashon di e konferensha “Huntu nos ta mas fuerte”, ku a tuma lugá na yüli 2022 na St. Maarten.
E organisashonnan di kuido ta eksperensiando un preshon kresiendo pa falta di personal. Esaki tin impakto riba kalidat i kontinuidat di kuido i ta suprayá e urgensia di tuma medida konhunto.
E harmonisashon di kondishonnan laboral (primario) entre e sinku organisashonnan di kuido ta duna un impulso, hasiendo trabou na Saba i Sint Eustatius mas atraktivo i ta kontrarestá konkurensia entre partidonan.
Partidonan ta hasi esaki basá riba un ambishon konhunto.
“E Akuerdo di Koalishon di Gobièrnu 2021 – 2025 (Un futuro mehor pa henter Reino) ta duna
partidonan un punto di salida importante. Igualdat ta formá parti di esaki, inkluso e esfuerso pa
hasi Bonaire, Saba i Sint Eustatius un parti igual di Hulanda. Den e konteksto ei, e Kontrato Kolektivo di Kuido BES, mester kontribuí spesífikamente na e kapasidat pa sigui brinda kuido di kalidat haltu na e habitantenan di e islanan aki. Relashoná ku e nivel di kondishon nan di trabou, partidonan ta enfoká riba e kontratonan kolektivo manera na Hulanda Europeo, Sindikatonan sigur ta di e mesun pensamentu ku
salarionan ku ta wòrdu paga den e sektor di kuido na Hulanda Europeo mester bira salarionan
ku ta wòrdu paga tambe pa e personal den salubridat na isla nan BES.
